Second division I League Team 18-in inelna an hmachhawn dawn

All India Football Federation hnuaia inelna ngaihhlut hlawh 2nd Division I League chu January kartawpah khelh ṭan a ni dawn a, team 18-in inelna an hmachhawn dawn. 

Club 18 inlan turte hi group pathumah club paruk zel awmin ṭhen hran an ni a, pakhatna ṭheuh chu final round khel turin an tling ang. 

Group A leh C-a pahnihna zinga a ti ṭha zawk chu final round khel tur hian an tling dawn bawk a, final round khel tur hian team pali an tling dawn tihna a ni. 

Final round lut tura group A leh C-a pahnihna zinga ti ṭha zawk an tlin a, group B ami an tlin ve theih loh chhan tur hi group B-ah I League & ISL reserve team an tam vang a ni. 

Group A leh C-ah hian I League & ISL reserve team pathum ve ve an awm a, group B-ah erawh team pali an awm thung - reserve team te hian pakhatna dinhmun hauh pawh ni se final round hi an khel thei lo. Second division champion hian I League an khelh theih dawn avangin All India Football Federation chuan I League-a hlut zawk theih nan reserve team-te chu final round an khelh a remti lo a ni. 

Second division inelna hi season dangah chuan hmun khatah vek khelh ṭhin a ni a, mahse AIFF chuan kuminah a kalphung thlakin home & away-a khelh tur a ni dawn. 

Final round erawh dan pangngaiin hmun pakhatah khelh tur a ni a, single leg-a inelna hi hmachhawn tur a ni tawh bawk ang. Sawi tawh angin final round-ah hian team pali chauh an awm dawn a, an inkhelh kual vek hnuah team pali zinga a sang ber chu season thara I League khel turin an tling dawn a ni. 

Tun hmain Aizawl FC leh Chanmari FC chuan I League second division inelna hi an lo hmachhawn tawh ṭhin a, I League champion hial ni ta AFC hi 2015 khan second division-ah hian champion-in Mizo club zinga a hmasa ber ni turin I League khel turin an inpet tling. 

Aizawl FC an champion ṭum hian Chanmari FC chu an elpui ber an ni a, Mizoram Premier League club hian pathumnaa awm chungin second division tournament an khar. Nikum khan Chhinga Veng chuan inelna hi an hmachhawn a, mahse Mizoram Premier League club langsar hi kuminah an inlan dawn lo - Mizo club tel tur an awm lo tihna a ni. 

Season hmasa second division inelnaah khan team 16 an tel a, kuminah erawh team 18-ah kai chhoin team pahnihin an pun belh tihna a ni. 

I League second division-a team pun chhan hi reserve team tel tam vang a ni a, kumina I League & ISL reserve team ni lo inelna hmachhawn tur zat hi club pariat chauh an ni. Season hmasa khan reserve team ni lo club 10 ngawtin inelna an hmachhawn a, kuminah erawh club pangngai aiin reserve team an tam tawh zawk. 

Club 18 tel tur zinga paruk chu a vawi khat nana second division inelna hmachhawn tur an ni a, an zinga club pali hi rerserve team an ni. 

FC Bengaluru United leh Rajasthan FC chu club pangngai zinga inelna a vawi khat nana hmachhawn tur an ni a, Bengaluru United hi India international hlui Gouramangi Singh enkawlna hnuaiah an awm. Indian Arrows (reserves), Punjab FC (reserves), Hyderabad FC (reserves) leh Mumbai City FC (reserves) chu a vawi khat nana second division hmachhawn tur an ni bawk. 

Group ṭhen dan

–––––––––––––––––––––––––––––––––––––

Group A: Lonestar Kashmir FC, Punjab FC (reserves), Garhwal FC, Rajasthan FC, ATK (reserves), Jamshedpur FC (reserves).

–––––––––––––––––––––––––––––––––––––––––––––––––

Group B: Mohammedan Sporting, Bhawanipore, Indian Arrows (reserves), Hyderabad FC (reserves), Bengaluru FC (reserves), Chennaiyin FC (reserves).

–––––––––––––––––––––––––––––––––––––––––––––––––

Group C: ARA FC, Mumbai City FC (reserves), FC Goa (reserves), FC Bengaluru United, FC Kerala, Kerala Blasters (reserves).