PSG-in Old Trafford an luhchhuah, Man United dinhmun a derthawng

Nilaini zan khan Old Trafford-ah Paris Saint-Germain-in Manchester United 3-1 in an hneh. French champion-in Neymar hmangin minute rukna lekah an khung a, United-in Marcus Rashford hmangin minute 32-naah sut mah se Marquinhos (69') leh Neymar (90+1') ten an khung belh.

Champions League group H inkhel dangah RB Leipzig-in Instanbul Basaksehir chu khualmualah 4-3 in an hneh. Man United, PSG leh Leipzig ten point kua ṭheuh an hmu a, Turkish club hmachhawn tur PSG dinhmun a ṭha. Ole Gunnar Solskjaer-a hote erawh last 16 lut turin December 8, Thawhlehni zanah Red Bull Arena Leipzig-ah point hlawhchhuah ngei a ṭul dawn a, a awlsam lo ang.

PSG-in Neymar leh Edinson Cavani inhmuh thiam loh ṭumin Brazilian forward an chhan a, a awmzia ber chu pound maktaduai 200 senga Barcelona aṭanga an lakluh hi a ṭhat zawk vang a ni.

Man United tana Cavani bul ṭan zanah pawh Neymar a langsar ta zawk. Brazilian forward hian goal hnih pawimawh tak a khung a, injury time-a a goal khung hi khung chak nemnghehna a ni satliah lo, pakhatna dinhmun luah theihna tur a ni.

Solskjaer-a hoten tun din-hmunah pakhatna dinhmun luah lailawk mah se French champion nen point 12 ve vea group stage an khar chuan PSG zawk hi pakhatnaah an awm ang.

Man United-in PSG lakah ball an chang tlem dawn tih chu a chiang sa a, amaherawhchu ball chan tam a pawimawh ber lo. Goal hmahruai khungtu Rashford chu hun pawimawhah a hriam tawk lo leh ṭhin.

Southampton laka goal hnih khungtu Cavani-a'n inkhel bul a ṭan a, second half-ah keeper chauh a hmachhawn hnuah 'chip' tum mah se crossbar a pet per. Hemi per hi Anthony Martial-a tan chance ṭha a ni a, a khung chuang lo.

French forward Martial hian goal ruakah a khung lo bawk. Cavani leh Martial ten chance ṭha an hlah hi 1-1 a nih lai a ni a, goal chu lut se inkhel result a dang thei ang.

Minute 23-na lekah Fred-a'n PSG midfielder Leandro Paredes a tauh a, red card hmuh theihna tur ni mah se referee Daniele Orsato-a'n Brazilian midfielder chungah zahngaihna lantirin yellow card chauh a pe. Fred tan zan duhawm a ni lo a, tihfuh tawk loh a ngah. Heti chung hian Solskjaer-a'n a la chhuak mai lo a, minute 70-naah Fred-a'n ama ball tih per laklet a tumna lamah Ander Herrera a titlu. Referee Daniele Orsato-a'n a vawi hnih nan yellow card a hmuh a, hnawhchhuah a ni.

United boss Solskjaer chuan, "Referee khan a tisual a, khelh zelna chance a neih phah. A khelh dan en khan thlakna tur a awm lo a, amaherawhchu referee thutlukna aṭang kha chuan thlak tur chu a ni," tiin a thlak lo chu a tihsual a nih thu a sawi.

PSG-in last 16 lut turin Istanbul Basaksehir hneh a tawk a, tling chiang tawhah an ngai fur. Amaherawhchu PSG boss Thomas Tuchel chuan, "Tling ṭep hi tling tihna a ni lo. Nasa takin hma kan sawn a, tling tur pawhin kan dinhmun a ṭha. Amaherawhchu kan team zinga tute pawh hian tling tawhah an inngai tur a ni lo. Engkim a chian hma chu tha kan thlah tur a ni lo," tiin a sawi.