Lyon an chak zo lo

French Ligue 1 khelh laiah Champions League semifinalist Lyon chu Bordeaux nen goal khung loin an inhnehtawk. Manager Rudi Garcia chuan inkhel thunun tak chunga hnehna an chang zo lo chu pawi a tih thu a sawi.

Inrinni zan inkhelah mikhual Lyon lamin ball an chang hnemin inkhel an thunun viau, mahse a pawimawh ber goal an neih theih bik miau loh avangin point khatah an lungawi a ngai - khelh hnihah point li hmuin pangana dinhmun an luah.

Lyon manager Garcia chuan, "Hun ṭha kan insiam hnem hle, ball pawh kan chang tamin goal khung tum pawhin kan shot hnem. Mahse vanduai ni chuan goal khung hi a harsa ṭhin, chutihrualin tlarhma lama kan hriat tawk lo tlat kha a mak," a ti.

Barcelona pan tura sawi Memphis Depay chuan Lyon tan inkhel bul a ṭan a, chhuak tur anga thawm nei reng midfielder Houssem Aouar erawh bench lamah dah niin, bench aṭangin tlan lut mah se danglamna a thlen thei bik lo.

Season hmasa khan Covid-19 vangin Ligue 1 hi khelh hmabak 10 nei chungin tihtawp a ni a, hun rei tak hnua a vawi khat nan Lyon hian tun season-ah European football an khel dawn lo. Europe-a inlan chhunzawm leh vat theih nan kuminah an ṭang zual hle.