Goal li khungtu Giroud

Chelsea-in Nilaini zan khan Europa League champion lai Sevilla 4-0 in an sawp a, goal zawng zawng hi Olivier Giroud-a khung vek a ni.

Ramon Sanchez Pizjuan-a point thum an hlawhchhuah avangin London club hi group E hmahruaitu an ni chiang tawh a, group match hnuhnung bera Krasnodar nen an inkhel turin awmzia a nei 

tawh lo.

Frank Lampard-a'n FIFA World Cup nomawi meuh chawi tawhtu Olivier Giroud a ring tawk lo a, French forward hian tun season League Cup-a Tottenham Hotspur an hneh loh ṭum chauhin bul a ṭan.

Amaherawhchu Giroud hi tun season-a Blues-in Champions League an khelh theihna chhan a ni a, kar liam ta khan Rennes nen an inkhelh ṭumin bench aṭanga lutin chakna goal a khung.

Sevilla meuh hmachhawn dawn mah se team pahnihin knockout stage an lut tawh a, inkhel a pawimawh tawk lo. Lampard-a'n Giroud bul a ṭantir a, Timo Werner leh Tammy Abraham hahdamna hun a peah a ngaih theih bawk.

Inkhel an ṭan chauh a, minute riatna lekah Kai Havertz-a ball pek chu Giroud-a'n box chhungah talbuai miah loin goal hmahruai khung nan a hmang.

Goal khatna a class a, goal hnihna a mawi leh hret. Minute 54-naah Matteo Kovacic ball fing zet chu Giroud-a'n rilru fim takin keeper Alfonso Pastor pet khum nan a hmang. Ke vei lam leh ding lama a khung hnuah Giroud-a'n minute 74-naah N'Golo Kante cross chu a tauh lut leh bawk a, 'complete striker' a nihzia pholangin 'perfect hattrick' a siam. French striker Giroud hian minute 83-naah penalty aṭangin goal lina a khung a, kum 34 mi striker hi Ramon Sánchez Pizjuán-ah a langsar ber. 

Chelsea tana khel turin Giroud-a'n a ṭha tawk tih a pholang a, chutihrualin Lampard-a'n player dang a rin zawk lai pawhin Didier Deschamps chuan World champion France tana khel turin a ṭha tawk tih a hre reng.

Blues boss Frank Lampard chuan, "Professional player dik tak a ni. Helai hmuna ka rawn awm hma hian rinrawl a ni lo a, chutihrualin a tir phat aṭang khan a khel emaw khel lo emaw a êng zawngin a thlir ṭhin. Player naupang zawk leh player dangte tan pawh a entawntlak a, engtik lai pawhin training ṭha takin a nei a, hun ṭha a neih hunah a rawn che chat a ni," tiin a fak.

Lampard-a'n Giroud a chhawr tam tawk lo hi dem theih a ni lo a, French forward aia a thlante hi player ṭha tak vek an ni. Nipui transfer laiin pound maktaduai 200 chuang sum an seng a, Champions League leh Premier League-a an dinhmun thlirin champion theihna tur player an nei tih a lang.