Team ṭha Liverpool khelmualah team talbuai United

Manchester derby-te han sawi hluai ṭhin mah ila, English football-ah na na na chuan Liverpool leh Manchester United inhalna tluka boruak sosang zawk hi a awm thei lo.

Kum thar kan chuang kai a, hetiang taka inkhel boruak sosang leh hmuhnawm hian min lo hmuak nghal - Pathianni zan dar 10:00 hian Anfield-ah Manchester United an lenglut dawn a, inkhel hmuhnawm a beisei ngam.

Hetihrual hian season dang zawng aiin team pahnih an inthlau a, United fans ṭhenkhat chu an tlawm sa! Mahse, football-ah eng pawh a thleng thei tih hre chungin United player-te an lenglut dawn.

Liverpool hian tun season-ah league match 18 khel tawhin vawi khat chiah an la tlawm a, hma an hruai mek - an inkara point awm zat hi point 23 a ni a, United point hmuh zat aiin a tam zawk!

Team talbuai United

United-in tun season-ah league match 19 khelin vawi ruk chiah an la chak! October thla êng hnuaia an ban tak Erik ten Hag hnuaiah khan match thum an chak hman a, coach lailawk Ruud van Nistelrooy hnuaiah match khat an chak.

Coach thar Ruben Amorim hnuaiah United hian match hnih hnehna an chang tawh a, league match riat a kaihruai tawh - league match thum a zawnin an tlawm tawh a, Portuguese coach hnuaiah an beisei harhtharna an chang thei lo.

United hi a tawi zawnga sawi chuan an la 'consistent' thei lo - Everton laka 4-0 a an chak khan fans an phur hluai a, mahse, Arsenal leh Nottingham Forest lakah a zawnin an tlawm zui.

Manchester derby-ah Pep Guardiola naute tlakchhiat lai an nang fuh a, an chak. United fan-ten an tho ta emaw an ti a, mahse, beiseina mai a ni - Bournemouth, Wolverhampton Wanderers leh Newcastle United lakah a zawnin an tlawm tawh!

Engtin nge ni ta?

Amorim hian kalphung nghet a nei a, chu chu tlarhnunga player pathum rem a ni - he system hi United-ah pawh hlawhtlinpui a tum a, mahse, tun thlengin a la tihlawhtling thei lo.

A tawi zawnga sawi chuan United fan-ten Amorim-a 'system' an la man hlawl lo a ni ber! Magpies nena an inkhel kha thlirkir chiah ila, player-ten an tih tur an hre lo a, an mawhphurhna kha an hrethiam lo a ni ber.

3-4-2-1 ah holding midfielder an pawimawh a, khelmual kil tin an uap hneh a ṭul - Christian Eriksen leh Casemiro te hi player ṭha huanga chhiar reng tawh tur ni mah se, an uai thla ṭan tawh tih a lang a, an hna an tlin lo.

Pathianni zanah tun season-a tlarhma hlauhawm ber pawl leh midfield ṭha Liverpool an hmachhawn dawn a, an ngaihtuahawm riau. Reds tan midfield-ah Alexis Mac Allister leh Ryan Gravenberch te inkawp leh tura ngaih an ni a, United midfield-in ngam zawk tura rin a harsa!

Tlarhnung ṭha

Liverpool tlarhmain fak an hlawh a, chumi rual chiaha sawi ngai chu tlarhnung a ni - Andy Robertson a la rintlak reng a, Trent Alexander-Arnold hi Real Madrid nen sawizawm ni reng mah se, khelmual pawn lam chanchinin a tibuai lo tih khelmualah a lang.

Virgil van Dijk-a'n a vanglai a chen thar leh a, Ibrahima Konate awm loh laiin Joe Gomez a rintlak viau zel bawk. Mahse, Gomez hi a inhliam ve leh thung a, Konate hian amah ang thoa hliam vanga chawl Conor Bradley nen training an zawm leh tawh thung.

Reds hi tun season-ah league-a goal chhuah tlem ber an ni mek a, goal khung hnem ber an ni bawk! Slot-a naute hi tlarhnung leh a hma lamah an chungnung kawp tihna a ni a, tun season-a goal 21 chiah la khung United lakah goal chhuah an tum lo ang tih a chiang.

Kum 2018 aṭanga chhiar ṭanin, Anfield-a United-in goal an khung hnuhnung ber chu December, 2018 kha a ni a, goal an khung ṭum pawh hian 3-1 in an tlawm. Pathianni zana thawnthu danglam tak beisei a harsa.

Zahngai ru!

Blackburn Rovers vanglaia an striker hlui, BBC pundit ni ta Chris Sutton chuan, "Liverpool hian goal 10 em chu an khung lo ang a, mahse, goal engemaw zat chu lut thei a ni chiang - United hi ka sawi nep vak duh lo zawk a ni," a ti!

Fans tam takin social media lamah fiamthuin Liverpool chu United laka zahngai turin an ngen bawk - a awm lo hran lo. Reds hian EPL-ah goal 45 khung tawhin, anni aia khung hnem an awm lo a, UCL-ah goal 13 khung tawhin an lamah goal khat chiah a lut a, hma an hruai mek bawk.

Mohamed Salah mawlh hi! Kum 32 mi forward hian tun season inelna hrang hrangah match 26 khela goal 20 khungin, assist vawi 17 a nei tawh! Luis Diaz-a'n match 24-ah goal 12 khungin assist vawi thum a nei a, Cody Gakpo hian match 27-ah goal 11 khungin assist vawi li a nei bawk.

Player pathum bakah hian Darwin Nunez leh Diogo Jota an la awm cheu bawk a, United tan Anfield-a Liverpool laka goal chhuah lo turin khelh ṭhat a ṭul a, Liverpool an vanduai tel a ngai dawn bawk!