Salah hi player ropui a ni - Slot

Liverpool manager Arne Slot chuan season duhawm tak hmangtu Mohamed Salah chu player ropui bik a nih thu a sawi. Slot chuan, "Player khaikhin hi thil harsa tak a ni a, ka team chauh ka en a nih chuan Mohamed Salah chauh lo, Virgil van Dijk pawh player ropui tak a ni.

"Defender a nih miau avangin Mo angin statistics sawi tur a tam lo, tih chauh a ni mai. Mo-a stats hi en ila, hei hian a nihna chu a hrilhfiah chiang ber - a goal khung zozai leh a khelh dan thlir ila, player ropui tak a ni tih a chiang," a ti.

Salah hian tun season-ah league match 18 khelin goal 17 a khung a, assist vawi 13 a nei. Target-a shot a neih zat ringawt hi 38 a tling a, key pass a neih zat hi 23 niin, vawi 31 dribble hlawhtlin a nei.

Mahse, Salah hian nipui transfer zawh rualin Liverpool-ah a contract a hmang zo dawn a, Virgil van Dijk leh Trent Alexander-Arnold ten an hmang zo tawh dawn bawk.

Salah leh VVD hi kum hnih dang an cham dawn niin khawthlang media-te chuan an ziak a, Arnold erawh Real Madrid zawm tur anga sawi a ni mek - Slot erawhin a sawi chiang duh lo.

Dutch coach chuan, "Tuna ka sawi theih chu Trent hi Pathianni zanah a inlan dawn a, tun hnaia a khelh ṭhat ang thoin a khelh ṭhat ka beisei. West Ham lakah game ṭha tak a khel a, ni tin rim takin a training reng a ni," tiin a sawi.