United leh tlak!

Manchester United fan-ten an beisei loh tawp thil an hria a, chu chu relegate thei dinhmuna an din thu an sawi hi a ni - Red Devils sulhnu ropuizia thlir chuan a inhmeh lo a, an tun dinhmun nena thlir erawh chuan a inhmeh thlap thung!

United boss Ruben Amorim chuan, "Kan dinhmun chiang taka kan hriat a ngai. He club hian chhuanlam zawn reng hi a kham tawh a, a chang chuan relegation hial ka sawi rik chang a awm - a chhan chu min thing harhtu kan mamawh a ni," a ti.

Red Devils hi EPL table-ah 14-na an ni mek a, point 22 an nei. Relegation zone-a awm mek Ipswich Town aia an sanna chu point sarih chauh a ni a, match hnih vel leka dinhmun hi danglam mai thei a ni.

Hetiang boruak karah hian United leh an thawmhnaw siamtu Adidas inremna chu tun hnai khan English media ten an pholang. Kum 2023 nipui khan United leh Adidas hian kum 10 chhung thawk dun turin thutlukna an siam.

United-in German company thawmhnaw an hak hian kum khatah pound maktaduai 90 an dawng! Mahse, United hi an relegate a nih chuan Adidas hian kum khat lek hriattirna pe lawkin, an inremna zawng zawng cancel vek theihna dan an nei a, hemi kum khatah pawh hian £90mtd pe loin £45mtd an pe thei ang tih an ziak tel.