Player ka hahdamtir lo ang - Slot

Liverpool fixture a hautak a, Pathianni zana United an hmachhawn hnuah, January 8, Ningani zan hian League Cup semifinal first leg an khel lehnghal dawn - Tottenham Hotspur khelmualah a ni ang.

Tun hnaia United result nen phei chuan Reds manager Arne Slot-a'n Red Devils hi player hahdamtir nan a hmang dawn niin an sawi! Hei hian United beisei phak lohzia a hrilhfiah.

Mahse, Slot erawhin an ṭhat dan bera United an mikhual tur thu a sawi. Dutch coach chuan, "Ka player ṭhate ka chawlh hahdamtir dawn lo. Ka tan chuan United hi team ṭha tak an ni a, league table hian an player neih ṭhat dan a hrilhfiah lo.

"Ruben Amorim tan an ṭhat dan bera a player-te khelhtir turin hun a ngai tih a hriat a, mahse, league table-in a tarlan ang ai hian an ṭha zawk a ni," a ti a, a khingpui team a sawi nep duh lo.

Slot hian Amorim duhsakna a sawi lang zui. Feyenoord boss hlui chuan, "Kan hnain pressure a ken tel hi kan hriatchian em avangin, manager-te hian kan manager puite kan lainat ṭhin hle.

"Mahse, manager-te chuan pressure hmachhawn hi nuam kan ti ṭhin a, ka sawi tawh angin Amorim hian Sporting-ah khan hna a thawk ṭha hle a, team ṭha tak a neih bawk avangin ṭha takin an khel chhuak thuai ang," a ti - coach-in a elpui coach a chhan tawh chuan an dinhmun a ṭha lo hle tihna a ni!