Amorim-a 3-4-2-1 leh buaina

Ruben Amorim-a'n theihtawp chhuahin, Sporting Lisbon-a a hlawhtlinpui 3-4-2-1 hi Manchester United-ah hman thiam a tum a, tun thleng chuan a la hlawhchham!

Tlarhmaa mahni chauha mal tlat turin Rasmus Hojlund a la hriam tawk lo a, Newcastle United lakah Joshua Zirkzee chu winger atan enchhin mah se la, a theihna leh thiamnain a tlin lo tih a lang bawk.

Amorim-a system man tur zinga ngaih ber Noussair Mazraoui pawh hi 'wing back' angin a talbuai a, attack hun tur leh tlarhnung ven hun turah a inkhap sual deuh reng a ni ber - tun dinhmuna Portuguese coach kalphung mil ber chu Diogo Dalot, Amad Diallo leh Harry Maguire chiah tiin a sawi theih.

Mahse, heti chung hian Amorim-a'n a system thlak a tum lo a, Portuguese coach hian hlawhtlinpui theih a inbeisei. Mahse, Liverpool laka 'back three' hman hi mualphona vawrtawp thlentu a ni thei tih erawh hriat a ṭha.

Amorim erawh a ṭang ve tlat. Sporting Lisbon boss hlui chuan, "Engtiklai pawha khelh dan phung kan thlak chuan tun ai hian kan dinhmun a chhe daih zawk thei. Kum hnih ngawt khelh dan phung nghet neia lo khel tawh an nih avangin ka player-te tan a harsa tih pawh ka hrethiam.

"Nangni pawhin inhmu a, keipawhin ka hmu. Mahse, ka duhdante ka tihhlawhtlin a ngai a ni. Ka system ka thlak avangin kan chak dawn tih hrechiang ila, ka ti em em ang. Mahse, hetiang ang club lianin coach an thlak chhan chu an result ṭhat loh vang a ni ṭhin," a ti a, kalphung thlak a, result hlawh chhuak tura United pan a nih thu a sawi.

Mahse, kum 1961 hnua a zawna an tlawm rei ber tawng mek United-in Amorim-a beisei ang result an la nei thei lo a, result chhe lehzual thei dinhmunah an ding mek.