Hmabak hlen tura inpeih Arsenal

Premier League chamion tum, beisei anga season hmang ṭha tawk lo Arsenal chuan an insiamṭha thawkhatah an inngai a, coach Mikel Arteta chuan an hmabaka tih tur awm hlen chhuak turin an inpeih tih a sawi.

Arsenal hian nikuma an match hnuhnung berah khan Brentford chu 3-1 in an hneh, goal an chuah hmasak hnuah Gabriel Jesus, Mikel Merino leh Gabriel Martinelli te hmangin an chhanglet a, point thum an hlawh chhuak.

Gunners hian zanin dar 11:00 hian Brighton an lenchilh dawn a, an chak a nih chuan champion an beiseina an chhinung zel ang a, point an hloh leh a nih erawh chuan an tan Liverpool umphak an harsa tawh ang.

Arteta beiseina

Brentford an hneh hnuah Mikel Arteta chuan, "Match tir lama goal kan chhuah hi chuan a harsa tawh ṭhin a, hmabak hlenchhuah tu hi a sang zual ṭhin. A pawimawh lai chu dawhthei taka nghah a, zawimuanga beih let theih lai hi a ni.

"Tunah hian Premier League champion leh champion loh pawh hi kan kuta awm a ni lo, chutihrualin kan kuta awm chin leh kan tih theih chinah chuan ṭha takin kan hlen chhuak vek tur a ni ang," tiin a sawi a, an chunga awm Liverpool umphak theih a la inring.

Gunners hian EPL match 19 an khelh aṭangin point 39 an hmu a, pahnihna an ni mek - hmahruaitu Liverpool an phak lohna chu point kua lai a nih avangin an inkar a zau, chutihrualin match khet tur zatve an la khel zo lo deuh, thil tam tak a la danglam thei.

Timber an hrem

Zanina Brighton nen an inkhelh hunah Arsenal defender Jurrien Timber chu hrem vangin a inlan thei dawn lo - Netherlands international hian tun season kal laiah yellow card vawi nga a hmu tawh, match khat khel thei lo tura hrem a ni.

An match hnuhnunga inlan thei lo Kai Havertz chu a inkhelh theih tawh a beisei awm a, chutihrualin tun hnaiah Gabriel Jesus a khelh ṭhat ṭhin avangin tlarhma laiah chuan Brazilian striker zawk a awm nawn leh a rinawm.

Declan Rice pawhin Brentford a hmachhawn thei lo. England international hi hliam na tak a ni hran lo a, chutihrualin coach Arteta-a'n a player ṭhate hi an dam chiang a nih loh chuan chhawr luih a tum lo a, zaninah an inlan a nih pawhin an la khel tluanin a rinawm loh a ni.

Thlasik hautak

Janaury thla kan chuangkaia a, tun thla chhungin Arsenal hian inelna hrang hrangah match pakua ngawt an khelh dawn, kar tin match pakhat aia tam an khelh zel a ngai dawn tihna a ni, a hautak dawn hle tih chu a chiang.

Arsenal manager Arteta chuan, "Match khelh tur kan ngah avangin player inkhel thei pawh kan mamawh hnem, ṭhenkhat phei chu an khelhna hmun tih danglam te pawh a ngai hial ṭhin a, team tana ṭha ber tur zel kan ngaihtuah," a ti.

North London club hian goal khung kawngah harsatna an nei ṭhin a, tun hnaiah Jesus leh Gabriel Martinelli ten hna an tlin chho a, coach Arteta tan pawh thawk huaina tham a ni ang, chutihrualin champion pui tham an ni em tih erawh hunin a hril dawn a ni.