Quarterfinal-ah Djokovic a lut

Novak Djokovic chuan Australian Open inbuatsaih nan Brisbane International a khel a, harsatna lian tham tawk lo9in quarterfinal a inhlangkai a ni.

Serbian star Djokovic hian Gael Monfils chu 6-3, 6-3 in a hneh, inkhel dangah Reilly Opelka chuan American player Matteo Arnaldi chu 7-6 (11-9), 7-6 (7-4) in a hneh ve bawk, nizan khan Djokovic leh Opelka te hi an inhmachhawn zui leh a, result erawh kan hre hman lo thung.

Grand Slam vawi 24 champion tawh Djokovic hian nikum khan major title lak a nei miah lo, kum 37 mi a nih tawh avangin a vanglai a pel ve tawh a, atan inelna lian hmachhawn a harsa ve tawh a ni.

A kum tam deuh tawg mah se Djokovic a la beidawng lo thung, tennis a khelh hun chhunga a nomawi 100-na a beisei mek bawk a, tun ṭumah hian a champion thei a nih chuan inrintawkna sang tak nen Australian Open a khel thei ang.

Inelna dang Hong Kong Open lamah Andrey Rublev chu last 16-ah a chak lo thung, a khingpui Fabian Marozsan lakah 5-7, 6-3, 3-6 in a tlawm. Hungarian tlangval Marozsan hian Chinese player Juncheng Shang a tum leh dawn a ni.

Hmeichhe inelna lamah Aryna Sabalenka pawh a chak. World number 1 Sabalenka hian Yulia Putintseva chu 6-4, 7-6 (7-2) a hnehin quarterfinal a lut a, a hmabak chu Marie Bouzkova a ni.

Inkhel dangah Anhelina Kalinina chuan Yue Yuan lakah 6-1, 6-4 in hnehna a chang a, a match lehpekah chuan Kimberly Birrell a hmachhawn leh ang.