Atalanta hnehtu Inter Milan

Inter Milan chuan Atalanta chu 2-0 in an hneh a, chak phu zawk ni chungin Italian Super Cup semifinal an paltlang, nomawi an inchuhpui tur erawh a la chiang lo thung.

Ningani zan inkhelah Denzel Dumfries chuan goal hnih a khung - Netherlands international defender hian second half-ah goal hnih a khung a, striker ten goal an khung lohna inkhelah Inter tan buaina tur a awm chuang lo.

Inter coach Simone Inzaghi chuan, "Ka naute khan duhthusama ṭhain an khel, goal hnih kan khung bakah kan goal kan venghim tluan vek a, khatiang kha duhthusam a ṭha a ni.

"Atalanta kha team ṭha tak an ni a, anni ang laka kan inveng thei kha a lawmawm," a ti. Nerazzurri tan hian striker Lautaro Martinez pawhin hun ṭha a nei nual a, goalkeeper Marco Carnesecchi chuan an lama lut rur a dang hnem hle.

Italian Super Cup semifinal lehlamah, nizan khan Juventus leh AC Milan an inkhel a, result kan hre hman lo - a chak zawk hian Inter Milan nen nomawi an inchuh zui leh dawn a ni.