Santosh Trophy-ah West Bengal an champion

India rama football hmanga state leh state inelna sang ber Santosh Trophy-ah West Bengal an champion. Sanjoy Sen-a hote hian final-ah Kerala chu injury time-a Robi Hansda goal hmangin 1-0 in an hneh. West Bengal tan Santosh Trophy vawi 33 an champion-na chiah a ni.

Final-a goal khungtu Robi Hansda hi man of the match-a thlan a ni a, inelna pumpuiah best player a nih bakah goal 12 khungin top scorer a ni bawk.

Team ṭha 2

West Bengal hian nikum khan final round an thleng pha lo a, kuminah erawh coach tawnhriat nei ṭha Sanjoy Sen hnuaiah an che ṭha takzet. Final round-ah West Bengal hi Manipur, Services, Jammu & Kashmir, Rajasthan leh Telangana te nen group khatah awmin chak loh an nei lo.

Sanjoy Sen-a hote hian point 15 hmuh theih aṭangin point 13 an hmu a, group-ah pakhatna an ni. Quarterfinal-ah West Bengal hian Odisha hian 3-1 in an hneh a, semifinal-ah Services chu 4-2 in an hneh leh bawk.

Kerala hian inelna hnuhnung berah Mizoram hneh loin quarterfinal-ah tla mah se kuminah pawh ṭum dang ang bawkin an ṭha a, final an thleng bawk. Group stage-ah Kerala hi Meghalaya, Delhi, Odisha, Goa leh Tamil Nadu te nena awm hoin point 15 hmuh theih aṭangin point 13 tho an hmu.

Quarterfinal-ah Kerala hian Jammu & Kashmir 1-0 in an hneh hram a, semifinal-ah kum zawna semifinal lut thei Manipur chu 5-1 zetin an sawp. Kerala hian Manipur an sawp theih avangin nomawi chawi pawh an inbeisei hle.

Final chu

Gachibowli Stadium in Hyderabad-ah Kerala leh West Bengal te an inhnehtawk a, minute 90 chhungin goal a la lut lo a, extra time khel mai tura ngaih an ni. Mahse, injury time-ah Kerala tlarhnung an inthlahdah zeuh a, West Bengal striker hriam ṭha Robi Hansda-a'n goal-ah a chantir.

Injury time minute linaah vei lam aṭanga ball vawrhluh chu box pawn aṭangin Manotos Maji-a'n box chhungah a tauh lut a, Robi Hansda hian um lutin goalkeeper man hmain goal-ah a pet a, champion-na goal a ni zui bawk.

West Bengal coach Sanjoy Sen chuan, "Bengal-ah chuan Santosh Trophy a nih chuan nomawi chawi ngei a ngai a, pahnihna kan nih chuan kan hlawhchham tihna a ni ang. Pressure a tam a, ka team-te naupang deuh mah se inelna chhung zawngin kan khel ṭha em em a ni," tiin a sawi.

Champion West Bengal hian cheng nuai nga an dawng a, Kerala-in cheng nuai thum an dawng. Chakna goal khungtu Robi Hansda-a'n best player a nih bakah final-a man of the match a nih avangin nuai hnih ngawt a dawng bawk.