January-ah kan chhunzawm a ṭul - Howe

December thlaah Newcastle United an che ṭha a, manager Eddie Howe chu manager of the month-a thlan a ni. Magpies hian zanin dar 6:00 hian Tottenham an tlawh dawn a, hmabak a harsa nghal dawn.

Newcastle hian December thla khan hmahruaitu Liverpool an chelh a, Brentford lakah 4-2 in tlawm mah se match hnuhnung pangaah an chak vek. Howe-a hote hian League Cup-ah Brentford 3-1 in an hneh let a; Leicester City (4-0), Ipswich Town (4-0), Aston Villa (3-0) leh Man United (2-0) te an hneh bawk.

Mapgies boss Eddie Howe chuan, "December kan hmang ṭha a, January-ah kan chhunzawm a ṭul. Hnehna kan chang ringawt lo a, kan tlarhnung a phui ṭha hi a lawmawm hle," tiin a sawi a, league match hnuhnung paliah goal an chhuah miah lo.

Mahse, Newcastle United khingpui tur Tottenham hi team hriatthiam har tak an ni a, an khelh ṭhat niah chuan eng team pawh hneh thei an ni. Spurs hian point 24 an hmu a, Newcastle hi point riat ngawtin an pha lo thung.