Bagan an chak nuamsa

Indian Super League-ah Mohun Bagan chuan January 2, Ningani zan khan Hyderabad 3-0 in an hneh. Salt Lake Stadium-ah mikhual team defender Stefan Sapic-a'n an lamah a tilut a, Kolkata club tan Tom Aldred leh Jason Cummings ten an khung belh.

Mariners hian match 14 aṭangin point 32 an hmu a, pakhatna dinhmun an luah mek. Hyderabad an hneh ṭum hian Kolkata club tan Mizo player khel an awm lo a, Hyderabad lamah Isak Vanmalsawma leh Ramhlunchhunga ten bul an ṭan thung.

Nizan khan NorthEast United leh Mohammedan SC te an inkhel a, result kan hre hman lo. Zanin dar 5:00-ah Odisha-in Goa an mikhual dawn a, dar 7:30-ah Jamshedpur leh Bengaluru te an inkhel chhunzawm ang.