Boxing Day Test-ah India an chak lo

India-in December 26-30, 2024 inkar khan Australia nen Test match vawi nga an khelh tura a vawi lina an khel a, mualneitu Aussies-in 184 runs-in hnehna an chang.

Australia hian vuak hmasak an thlang a, Steve Smith (140) leh Marnus Labuschagne (72) te chet ṭhat zarah 474 runs an siam. India tan hmabak harsa mah se Nitish Kumar Reddy-a'n century (114) a siam a, Yashavi Jaiswal-a'n 82 runs siam bawkin 369 runs-in an chhanglet.

Second innings-ah Aussies tan Labuschagne-a'n 70 runs a siam a, 234 runs siamin India tan 340 runs target an chhawpsak. Mikhual team tan hnehna chan aiin draw chu tih theih sang ber niin a lang a, mahse captain Rohit Sharma leh (9) leh Virat Kohli (5) ten beisei an phak miau loh avangin 155 runs chauh an tlin.

Australia hian series-ah 2-1 in hma an hruai a, nimin aṭang khan Sydney Cricket Ground-ah Test match hnuhnung ber an khel ṭan. Ni khatnaah bat hmasa zawk India-in 185 runs chauh siamin an thi vek. Australia hian bat ṭanin Usman Khawaja thi tawh mah se chak turin an dinhmun a ṭha leh tawh zawk. Tukin zing dar 5:00-ah a ni hnihna chhunzawm a ni ang.