Barcelona-in Olmo an la ziak lut thei lo

Barcelona-in nipui bazara RB Leipzig aṭanga an lakluh Dani Olmo chu season tluana chhawr theih turin ziahluh tum mah se an la hlawhchham. Catalan club hian Olmo hi nikum August thla khan euro maktaduai 60 (£51m) in an lalut a, tun season-ah match 15 khel tawhin goal ruk khung tawh mah se kuminah erawh an la ziahluh theih loh avangin chhawr theih a la ni lo.

Kum 26 mi Olmo hi hlawh chungchanga La Liga inkhuah khirhna vangin season chanve atan chauh an ziaklut phawt a, tuna an ziahluh theih mai loh avangin zanin dar 11:30-a Barcelona leh Barbastro ten Copa del Rey last 32 an khelh hunah pawh a la inlan thei lo ang.

La Liga thuchhuahin a tarlan danin Barcelona-in dan zawm theih an nei lo a, chutihrualin an dan hman lai hi Catalan club tiamin sawisel an la awm lo niin an tarlang bawk. Spanish club hian Olmo an ziahluh theih nan Nou Camp-a VIP box chu hralh an tum a, euro maktaduai 100 chuang hmuh theih inbeisei mah se La Liga-in an pawmpui leh phawt a ṭul dawn.

Barca hian Olmo hi an ziahluh theih loh chuan free agent a ni dawn a, Spanish forward hian a duh club a zawm theih dawn. Tun dinhmunah Olmo duhtu zingah Premier League club pawh sawi rik an ni a, chutihrualin Olmo hian Barcelona tana khelh theih a la inbeisei hle.

Spain-in nikum European Championship-a nomawi an chawi khan Olmo hi player pawimawh a ni a, Hansi Flick hnuaiah player pawimawh a ni bawk. Tunkar tawpah Copa del Rey khelh a ni ang a, karleh lamah La Liga chhunzawm a ni ang. Chutihrualin Real Madrid leh Valencia ten nizan khan league match an khelh hmabak an khel thung.