Leeds hmuhnawm mah se Liverpool an chak

Kum 16 hnua a vawi khat nan Leeds United-in Premier League match an khel ve leh ta a, game hmuhnawm tak pho chhuak mah se champion lai Liverpool laka chak nan erawh a tawk zo lo thung.

Inrinni zan khan Anfield-ah Liverpool-in Leeds an mikhual a, 4-3 in an chak. Reds tan Mohamed Salah chuan hattrick siam mah se Leeds huaisenna chu inkhelh zawha fak hlawh ber a ni a, team pahnihin inhlau miah loa attacking game an khelh avangin an hmuhnawm takzet. 

Liverpool hian vawi thum ngawt hma hruai mah se Leeds-in an sut ve zel a, minute 88-na Salah penalty erawh Premier League kai thar tan sutna hun a awm tawh lo. Hun a tawp zui a, Liverpool an chak.

Anfield-a inkhel enkawltu Michael Oliver-a'n inkhel tawpna hamrik a ham tawp rualin Jurgen Klopp-a'n, "Wow," tiin ṭawngkam a nei nghal a, hei hian inkhel hmuhnawm a nihzia a hrilhfiah. 

Liverpool tan minute lina lekah Salah chuan goal hmahruai a khung nghal a, he goal hi penalty aṭanga lut a ni - Leeds defender thar Robin Koch chuan Egyptian forward shot hi a kutin a lo tawk fuh a, a penalty chawi chu Salah hian goal-ah a chantir. 

Inkhel entute tan chuan, "Eng zat tak khung ang maw?" tia Liverpool forward lam hawi chu thil awl tak a ni a, mahse Leeds ngaihdan a ni ve lo. Marcelo Bielsa naute hian goal an chhuah aṭanga minute 12-na lekah si phurh an rawn sut a, Jack Harrison-a'n Reds defender rual bumin mawi zetin a khung. 

Minute 20-na a ni a, Virgil van Dijk-a hun a ni. Dutch defender hian Leeds defending chhia zarzoin corner aṭanga ball kal chu a tauh lut a, a hlim chhung erawh a rei lo hle - minute 30-na lekah fimkhur lo takin ball petchhuah a tum a, hemi lochang fuhtu Patrick Bamford chuan si phurh sut nan a hmang. 

Minute 33-naah Salah bawk inlarin an goal thumna a khung a, Leeds-in Mateusz Klich-a goal class hmangin an chhanglet - mahse bench aṭanga luhtir pound maktaduai 30 man Rodrigo-a'n ṭul lo takah Fabinho a ti tlu a, Salah-a'n a hattrick siamna goal ni turin a khung. 

Anfield-a an chak loh danah Leeds-in 'vanduai' tia inchhal an timin a rinawm loh a, chutihrual chuan 'tawnhriat neih tlem vang' tiin a sawi theih bawk - a tawp bera dem tur erawh goal khung tura lut Rodrigo a ni a, Spanish striker penalty chawi kha a ṭul lo takzet.

Leeds tlarhma an hmuh-nam a, an khelh dan enin Premier League-in team hmuhnawm an neih belh leh ta niin a lang. Chutihrualin tlarhnung lamah inzir belh an la mamawh niin a lang a, goal khung ringawt ni loin a ven lam an ngaihtuah tel a ngai ang. 

Liverpool-in an nomawi humhim an tum chuan fimkhur an mamawh tih an hriat tel a ṭha a, chutihrual chuan match khata chetsual zauh vanga insiamṭhat mamawh viau anga Van Dijk te 'meuh' chhuah nghal chu thil harsa tak a ni. 

Trent Alexander-Arnold tan erawh zan theihnghilh tlak a ni a, PFA Young Player of the Year ni lai hian defending lamah rilru a sen lehzual deuh a ngai niin a lang - tlarhma erawh Salah, Sadio Mane leh Roberto Firmino-te an la awm reng avangin ngaihtuahawm an ni lo. 

Liverpool boss Jurgen Klopp chuan, "Game ropui tak a ni a, team ṭha tak an ni - team pahnihin kan khel ṭha ve ve a, hmuhnawm ka ti hle. Game khata heti zat goal luh hi chu a khat em em a, hahdam taka hawin kan awm mai mai dawn lo. Uluk taka zirchian a ngai a ni," tiin an defending lam an ngaihtuah ṭhat tur thu a sawi. 

Klopp chuan sawizawmin, "Leeds an ṭha a, an khelh ṭhat em avangin a harsa hle - ni dawn tak e, minute 95 lai game harsa tak kan khel a ni," a ti a, hun pek belh tamtu referee a kap pah! 

Leeds manager Marcelo Bielsa chuan, "Goal thum khung theih hi thil lawmawm a ni a, goal li kan chhuah kha en kan theih a ni lo bawk - kan goal chhuah ṭhenkhat chu chhuah loh theih tur a ni," tiin an fimkhur tawk loh thu a sawi. 

Argentine coah chuan, "Football chu sawi lawk theih a ni lo a, mahse thil thleng ngei tura kan hriat sa chu a awm ve bawk. A thleng dawn tih hriat avanga thlamuang taka awm mai tur a ni lo," a ti bawk a, defending lama fimkhur tawk lo a naute a dem. 

•    Liverpool-in league match 60 chhung chu a zawnin mahni mualah tlawm an nei tawh lo a, hetih chhung hian vawi 49 chakin vawi 11 an khingpui an inhnehtawkpui - Chelsea (86, Ocotber 2008) leh Liverpool (63, December 1980) chiahin he record hi an lo ti thei tawh. 

•    Liverpool leh Leeds inkhel hi August 2006-a Manchester United-in 5-1 a Fulham (4-1, half time) an sawp hnua Premier League opening match-a first half-a goal nga a luh hmasak ber a ni. 

•    September 1982 hnua a vawi khat nan Liverpool-in mahni muala league match an khelhah a zawnin goal thum aia tam an chhuah ta. 

•    Mohamed Salah-a'n Premier League-a goal a khung hnuhnung 35-ah Liverpool a chakpui vek a, Wayne Rooney (34, September 2008 - February 2011) record chu a lehpel. 

•    Virgil van Dijk-a'n Liverpool tan Premier League-a a goal 10-na a khung ta chiah a, January 2018-a Liverpool tan a khelh hnuah Premier League-a ani aia centre back goal khung hnem an awm lo - goal 10 zinga pakua hi a tauh luh a ni. 

•    VVD-a'n Premier League match-a khelh hnuhnung pali aṭangin a tihsual vangin vawi hnih-a team-in goal an chhuah a, Premier League-a a match hmasa 154 aiin a match hnuhnung palia a tihsual vanga goal lut hi a tam zawk!

•    Jack Harrison, Patrick Bamford leh Mateusz Klich-te kha Nick Barmby (August 2002) hnua Leeds United tana Premier League match hmasa bera goal khung nghal thei an ni a, Alan Smith (November 1998) hnua away-a ti thei hmasa ber an ni bawk - Alan Smith hian Anfield-ah, Liverpool lakah tho a khung.