Arsenal tan EPL nomawi a hla tual tual
Nasa takin an um a, an ban a, mahse an ban phak lohah Premier League nomawi chu hun hlat zel a ni - Mikel Arteta enkawl Arsenal tan EPL champion beiseina a la bo lo, mahse champion tur erawh chuan thil mak a thlen a ngai tawh thung.
Inrinni zan inkhelah Gunners hian Ethan Nwaneri-a goal hmangin hma an hruai a, inkhel chawhnu lamah Brighton & Hove Albion chuan Joao Pedro-a penalty hmangin an sut a, 1-1 a inhnehtawkin point an insem.
North London club hian EPL match 20 aṭanga point 40 hmuin pahnihna an ni a, an chungah Liverpool (45 points) an awm. Reds hian nizan khan Manchester United an mikhual a, an chak a nih chuan an inkar hi a zau leh zual ang.
Point an hloh
Tun hnai khan Mikel Arteta chuan, an um mek Liverpool an chesual a nih chuan an hun ṭha an bawhpelh loh tur thu a sawi a, mahse, a thusawi aṭanga match an khelh lehna hmasa berah point an hloh nghal, champion zia tia sawi a remchang lo.
American Express Stadium-a inkhelah Arsenal lamin goal an nawr na zawk a, rawlthar Nwaneri chuan minute 16-na lekah goal hmahruai a khung - goal an khung dawn hian Declan Rice leh Mikel Merino te che vel a hmuhnawm a, goalkeeper Bart Verbruggen tan dan theih a ni lo bawk.
Gunners lamin goal nawr zui mah se an khung belh thei lo - Gabriel Jesus ke a hmui lo a, Bukayo Saka awm loh laiin tlarhma sir lam aṭangin ball hlauhawm a chhuak hleithei meuh lo, damlo Kai Havertz awm loh a lang bawk a ni.
Brighton an inveng thiam a, vannei takin penalty an hlawhchhuak bawk. Ball kang an inchuhna lamah William Saliba chuan Pedro a tauh, thil thleng hi video assistant referee hmanga ennawn niin penalty an pe.
Arsenal player lamin an sawisel nasa viau a, mual sir aṭangin coach Arteta chu a lungawi lo tih a lang bawk - mahse thutlukna sawh sawn a ni lo. Pedro chuan si ban nghaktu David Raya bumin si phurh a sut, point khat hlu tak an hlawh chhuak.
A mak - a na!
Point an hloh a, goal an chhuah dawna penalty an chawi danah Mikel Arteta a lungawi lo. Referee Anthony Taylor thutlukna chungchang sawiin Arteta chuan, "Football a ka hun hman tawhah khatiang penalty kha ka la hmu ngai lo.
Keimah chauh ni loin midang pawh ka zawt a, an la hmu ngai bik lo. Joao khan ball a tawk a, ani ang bawkin Saliba pawhin a tawk. Official bulah thil thleng ka ennawn a, second thum hnu lekah penalty turin thu an titlu," tiin a sawi.
Gunners hian Thawhlehni zanah League Cup semifinal khel turin Newcastle United an mikhual dawn a, kar tawpah Manchester United nen FA Cup an khel ang, league match an khelh leh hmasak bera an khingpui tur chu Tottenham Hotspur an ni bawk.
Arteta chuan, "Player hliam leh damlo kan nei, kan dinhmun hrang hrang thlir chuan tun ṭumah khan kan khel chhe lo," a ti a, amaherawhchu point khat chauh hmuh belh chu champion tum tan a bei tham lutuk tih hrechiangtu a ni.
Gunners hian kumin January tla chhung hian match khelh tur pakua an nei, thlasik khaw vawh vanglai hian an talbuai a nih chuan nomawi an beisei theih ho a bo duak thei dawn tihna a ni a, coach Arteta leh a naute tan rilru fim taka hun hman a ngai ang.