Nomawi nena bul ṭan Sabalenka

Hmeichhe tennis world number 1 Aryna Sabalenka chuan season bul a ṭan fuh hle, nimin khan Polina Kudermetova hnehin Brisbane International title a la.

Belarus star hian duhthusama ṭhain bul a ṭan bik lo, qualifying aṭanga invaw tling Kudermetova-i'n set a la hmasa. Mahse, a rei hnuah player ṭha zawk ding changin 4-6, 6-3, 6-2 in a chak.

Sabalenka a hlawhtlin lai hian Naomi Osaka erawh a vanduai thung. Japanese star hian Auckland-ah WTA Tournament a khel a, nimin khan final khelin Clara Tauson lakah set khatna chu 6-4 in a la, mahse hliam vangin a khel chhunzawm thei ta lo.

Osaka hi a pum na vanga enkawl lailawk a ni a, inkhelh chhunzawm tumin theihtawp chhuah mah se a chhunzawm thei ta lo. Osaka chuan, "He hmuna inkhelh hi nuam ka ti a, tuna ka tawp dan erawh hrehawm ka ti hle," a ti.

Brisbane International leh Auckland Open te hi Australian Open 2025 inbuatsaihna an ni. Tennis season khat chhunga Grand Slam hmasa ber hi Janaury chawlhkar hnihna aṭangin Melbourne Park-ah an khel ṭan ang.