Chelsea tan champion a hla zel

Enzo Maresca-a'n, "Nomawi chawi thei dinhmunah kan la ding lo," tiin a sawi fo a, mahse, Chelsea ṭantuten an coach thusawi an hai der a, "Kan champion thei alawm," an ti a, beiseina an nei.

Mahse, Chelsea hrechiang bertu thusawi dikna kan hmu zel - Inrinni zan khan Crystal Palace khelmualah Blues an lenglut a, an mikhualna ramah chak zo loin, 1-1 in an ṭin. Chelsea hian hmahruaitu Liverpool chu point kuain an phak lo a, match hnihin an khel tam zawk bawk. Reds hi nizan khan an inlan a, Manchester United an hneh chuan an inthlauhna hi a danglam leh ang.

Blues tan Cole Palmer chuan minute 14-naah goal hmahruai a khung a, mahse, London club hian goal dang an khung thei lo zui. Minute 82-naah hrem an ni a, Jean-Philippe Mateta chuan si phurh sutna goal a khung.

Hun tawp thlengin goal dang a lut tawh lo a, Blues an chak zo lo. An mang ram aṭangin Chelsea ṭantute ben harhin an awm a, "Kan champion dawn em?" tih ai chuan, "Champions League kan khel dawn em?" tih chu zawhna a ni leh ta.

'COLD' Palmer

Selhurst Park-a inkhelah Blues-in goal khung turin hun an mamawh rei lo. Minute 14-naah Palmer a inlar a, English midfielder thiam bik hian Jadon Sancho-a thawhrim zarzoin goal hmahruai a khung.

Kum 22 mi tan tun season-a league match 20 a khelha goal 13 a khungna chiah a ni a, assist vawi ruk a nei tawh bawk. Mahse, Blues-in goal khung hma mah se, tlarhmaah an hriam zui lo a, chance an hlah hnem hle.

Maresca hnuaia hma a sawn thu hahipa an sawi Nicolas Jackson-a'n a zia ṭhenkhat a la thlah lo a, chance vawi thum ngawt a hlah - Sancho, Moises Caicedo leh Josh Acheampong ten uiawm takin an hlah bawk.

Chelsea-in inkhel an thunun a, a pawimawh ber goal khung belh erawh an harsat. Palace hian first half-ah chance sawi tur an nei ve meuh lo a, mahse, second half ṭan hnu lawkah Eberechi Eze chuan uiawm takin chance a hlah a, Blues thinphu a rang ve ṭan.

Hremna chu

Palace rawn phur thar mah se, inkhel thununtu chu Chelsea tho an ni a, mahse, first half-a an buainain a kiansan lo - Jackson, Pedro Neto leh Enzo Fernandez ten an hun ṭha neih an chhawr lo vek.

Hun tawp nan minute riat chiah a awm tawh tihah Palace-in Chelsea an hrem ta nge nge a, Mateta chuan Eze ball siamsak chu tun season-a a league goal ngana ni turin awlsam takin a khung.

Chelsea player an hawihai a, hun a tlem tawh tih an hai lo. Mahse, goal dang an sual chhuak thei chuang lo a, a tawpah point khata lungawi an zir - Palace tan result ṭha a ni a, table-ah 15-na niin, relegation zone an hlat zel.

Blues erawh league match nga a zawna an chak hnuah match li zet an chak zo ta lo. Match hnih an draw a, match hnih an tlawm. Match liah hian 'Big Six' hmachhawn an nei lo a, Maresca sawi angin Chelsea hi, "Champion turin an la puitling tawk lo," a ni.