Man City leh Haaland an rawn kir e

Nikum kum tawp lamah Manchester City leh an striker chhuanvawr Erling Haaland-ten beisei pha lo mah se kuminah erawh Pep Guardiola hoten West Ham United 4-1 a sawpin bul an ṭan a, Norwegian striker-in goal hnih a khung.

Man City hian hnehna chang mah se match 20 aṭanga point 34 chauh an hmuh avangin table-ah paruknaah an awm mek. A zawna season li chhung champion thei Pep-a hote tan nomawi humhim a harsa dawn.

City star Savinho

Etihad Stadium-ah Man City tan Savinho a che ṭha a, mual vei lama a tal nat avangin goal pawh an khung hma. Minute 10-na lekah Savio cross chu Hammers defender-in tauh chhuak mah se a cross vawi hnihna erawh Vladimír Coufal-a'n an lamah a tilut.

Savinho a nung chhunzawm a, vei lam aṭanga a cross ṭha zet chu minute 42-naah Haaland-a'n a tauh lut a, halftime-ah 2-0 a ni. Second half-ah pawh Savio a che ṭha chhunzawm a, minute 55-naah a ball pek ṭha chu Haaland-a'n a khung.

Norwegian striker hian thla thum hnuah match khatah goal hnih a khung a, goal a khung theih nan Brazilian winger Savio a che ṭha hle. West Ham tlarhnung an fimkhur tawk lo a, an pass sual chu Kevin de Bruyne-a'n changin Phil Foden tan a siam a, English midfielder hian minute 58-naah goal lina a khung.

City an la phui lo

Man City-in Hammers an mikhual hmain Leicester City lakah clean sheet nei mah se an tlarhnung a phui ṭhat loh avangin goal an chhuah ve reng.

West Ham lakah pawh City tlarhnung a nghet ṭha tawk lo a, Germany international striker Niclas Fullkrug-a'n minute 71-naah goal khat a khung. City-in goal li an khung theihna inkhelah goal an venghim thei lo a, Crysencio Summerville-a'n chance ṭha bik hlah lo se chuan mikhual team hian goal hnih an chhuah ngei ang.

Pep Guardiola chuan, "Result chauh in thlir a, kan khelh dan erawh a ṭha tawk lo. Kum danga an khelh dan ang kan la pha lo. Chutihrualin ka lawm lo tihna a ni lo a, kan chak avangin ka lawm a, FA Cup hma chu tui takin ka muhil thei tawh ang," tiin a sawi a, Man City ṭhat dan ber an la nih loh thu a sawi.