Jerry-a goal a tawk zo lo

Inrinni zan Indian Super League inkhelah Odisha tan Jerry Mawihmingthanga'n goal a khung a, a team a chakpui zo lo thung - Odisha hian FC Goa mikhualin, 4-2 in an tlawm.

Goa hian Brison Fernandes hmangin minute riatna lekah goal an khung a, Odisha-in Ahmed Jahouh hmangin chhanglet vat mah se, Goan club chhaih kawlhna a chang.

Udanta Singh chuan first half tawp hma hretin FC Goa hmahruai nawnna goal a khung a, Brison-a'n khung belhin, Amey Ranawade chuan an lamah a tilut bawk - Jerry-a'n minute 88-naah khung ve leh mah se, a team kai harh turin a tlai hret tawh.

Chanmari chhuanvawr Jerry hian tun season ISL-ah goal thum a khungna chiah a ni a, an league match hnuhnung pangaa a khung a ni.

Inrinni zan inkhelah hian Odisha tan Jerry bakah Jerry Lalrinzuala leh K. Lalṭhathanga (Puitea) ten inkhel bul an ṭan a, Isak Vanlalruatfela chu hliam vangin a chawl mek.

Khalid Jamil pawh a kal zel - a club enkawl Jamshedpur FC chu playoff khel turin dinhmun ṭhaah a dah zel a, Inrinni zan khan Bengaluru chu 2-1 in an hneh.

Bangalore club hian Alberto Noguera hmangin goal hmahruai an khung a, mahse, Men of Steel hian minute 84 hnu lamah Jordan Murray leh Muhammad Uvais hmanga goal khungin, 2-1 in hnehna an chang daih.

Zirtawpni zanah ISL inkhel pakhat awmin, NorthEast United chuan Mohammedan SC an mikhual a, 0-0 in an ṭin. Mohammedan tan Vanlalzuidika Chhakchhuak, Joe Zoherliana leh Lalremsanga Fanai ten inkhel bul an ṭan.