Spurs keeper thar Kinsky

Tottenham Hotspur-in goalkeeper Antonin Kinsky chu Slavia Prague aṭangin an la lut. Kum 21 mi Kinsky hian Inrinni khan medical test a paltlang a, kum 2031 thleng daih contract a ziak. A man zat hi pound maktaduai 12.5 a ni

Spurs hian hliam vangin first goalkeeper Guglielmo Vicario an chhawr thei lo a, February thla tawp lamah a inlan thei chauh ang. Vicario aiawhtu Fraser Forster inlan ṭumin match 11-ah vawi hnih chauh an chak a, Inrinni zana Newcastle United an hneh loh ṭumin damlohna avangin a inlan thei lo bawk.

Forster a inlan theih loh avangin Brandon Austin chu club tan a vawi khat nan a inlan a, Ange Postecoglou hote hian goalkeeper hi an mamawh takzet. Kinsky hi Czech Republic Under-21 international a ni a, Slavia Prague tan match 29 khel tawhin clean sheet vawi 14 a nei a ni.