Copa del Rey - Barcelona an chak nuamsa

Spanish football-a inelna ngaihhlut hlawh Copa del Rey round of 32-ah Inrinni zan khan Barcelona an inlan a, khualmualah Spanish fourth division club Barbastro chu 4-0 ngawtin an sawp.

Barcelona tan Robert Lewandowski chuan goal hnih a khung a, Eric Garcia leh Pablo Torre ten goal khat ve ve an khung bawk - mualneitu Barbastro lamin a chhanletna an nei lo a, Catalan club lakah dawl zawrin an zawr.

Nimin zing lamah Atletico Madrid pawh inlan vein, third division club Marbella FC lakah 1-0 in hnehna an chang. Antoine Griezmann chuan inkhela goal awmchhun hi a khung.

Hetihlai hian Real Madrid erawh zaninah an inlan ve dawn chauh a, zan dar 11:30 hian fourth division club Club Deportiva Minera chu khualmualah an lenchilh ve leh ang.

Flick a thutak

Kum thar chawlh hnua Barca match hmasa ber a ni a, fourth division khelmualah an leng bawk. Hetiang a nih avang hian Barca coach Hansi Flick-a'n team nem zawk a thawhchhuahpui tura ngaihna a awm.

Mahse, Barcelona hi tun hnaiah an tawlhthlu a, an league match hnuhnung pathumah chak zo loin table-ah pathumna an ni leh daih tawh. Hetiang boruak karah Flick-a'n inchawlh hahdamtir a ṭul a ti lo a, an ṭhat dan ber tia chhal theih deuhthawin player a luhtir.

Minute 21-na lekah Catalan club tan Eric García chuan goal hmahruai a khung nghal a, minute 31-naah Lewy chuan Pablo Torre-a freekick aṭanga ball kal chu a tauh lut bawk.

Barca hian an duhtawk mai lo. Second half ṭan aṭanga minute hnihnaah Lewandowski chuan tun season inelna hrang hranga a goal 25-na a khung a, Lewy goal khung tur vawi hnih ngawt siamsaktu Torre chuan minute 56-naah khung belhin a hmawr a bawk.

Chhinchhiahtlak

Barca-in Barbastro khelmualah nuamsain hnehna an chang a, an club hneh hi fourth division chauh ni mah se, Catalan club tan inrintawkna siamsaktu match a ni thei - Nilaini zanah Barca hi an inlan zui dawn a, khualmualah Athletic Bilbao an lenchilh ang.

Hetihrual hian Barca tan Inrinni zan inkhel hi zan chhinchhiahtlak a ni tel. Nipui transfer-a inkhel chawlhsan tawh, October 2024-a Catalan club tana inkhel tura an thlem hlawhtlin Wojciech Szczesny chuan Barca tana a match hmasa ber a khel.

Juventus tana match 252 kheltu keeper tan pawh zan chhinchhiahtlak a tling. Polish keeper Szczesny bakah hian Toni Fernandez chuan Catalan club tana a match hmasa ber a khel ve bawk a, kum 16 mi chauh a la ni!

Spain Under-18 international hi minute 81-naah luhtir a ni a, khelmual a luh hian Barca hian goal li an khung fel tawh - Catalan club hi Spanish Cup-ah hian vawi 31 champion tawhin, champion ngun ber an ni a, 2020-21 season hnuah erawh an la champion leh lo.

Atletico an chak

Diego Simeone nauten chak nuam an ti laklawh a, Marbella khelmualah 1-0 in an chak - captain Griezmann chuan inkhela goal awmchhun a khung a, tun season-a goal 12 a khungna chiah a ni.

Atletico tan Rodrigo De Paul chuan a khung belhah a inngai a, mahse, Argentine midfielder goal khung hi offside vangin pawmsak a ni lo a, Conor Gallagher chuan uiawm takin post a tihper bawk.

La Liga table-a pahnihna Atletico hi inelna hrang hranga an match hnuhnung 13-ah an chak tawh a, league-a hmahruaitu Real Madrid an phak lohna pawh point hnih chauh niin, match khatin an la khel tlem zawk!

Hetihlai hian Inrinni zan inkhel ngaihven hlawh dangah chiang takin Sevilla an tlawm a, Almeria chuan 4-1 in an sawp. Sevilla tan Isaac Romero chuan goal hmahruai khung zuk mah se, Almeria tan Colombian forward Luis Suárez chuan hattrick a siam a, Marko Milovanovic chuan goal khat khung bawkin, second division club-in La Liga club an hneh.