Vawiin aṭangin T20 Australia Vs India

Australia leh India chuan vawiin chawhnu dar 1:40 aṭangin T20 match an khel ṭan dawn a, match thum khelh tura a hmasa ber hi Manuka Oval, Canberra-ah an khel ang. Aussies hian Men in Blue hi ODI match thum an khelhah 2-1 in an hneh tawh a, T20 zawh hian Test match-ah an inhmachhawn leh ang.

ODI-ah hian India-in beisei ang result hlawh chhuak lo mah se captain Virat Kohli erawhin record a siam. Kum 32 mi Kohli hian run 63 a siam a, run 12,000 siam tura hun mamawh tlem ber niin Sanchin Tendulkar-a record a khum. Sachin khan run 12,000 vaw chhuak turin match 309 a mamawh a, heng zinga match 300-ah hian a lut. Kohli erawhin match 251 (242 innings) chiah a mamawh.

T20-ah England hi pakhatnaah an awm a, Australia leh India hi pahnihna leh pathumnaah an awm. Indian Premier League vangin India-in player ṭha an kawl hnem a, player thlan pawh a harsa dawn. Bul ṭan tur pawhin Shikhar Dhawan, Mayank Agarwal, KL Rahul leh Sanju Samson te an awm a, Virat Kohli leh Shreyas Iyer te chu pathumna leh palinaa awm tura ngaih 

an ni.

All rounder pawh Hardik Pandya, Ravindra Jadeja leh Washington Sundar te an kawl a, bowling department-ah Jasprit Bumrah, Mohammed Shami leh Navdeep Saini te an awm bawk. Amaherawhchu Aussie hian inhliam vanga opener David Warner an hman dawn loh bakah bowler ṭha mi Pat Cummins an hahchawlhtir chungin player ṭha Aaron Finch, Steve Smith, Marnus Labuschagne leh Glenn Maxwell te an la kawl a, an muala khel tur an nih bawk avangin rinkai zawk an la ni tho ang.