Olmo la ziak lut thei lo

Barcelona chuan nipui transfer-a an player lakluh pahnih, midfielder Dani Olmo leh forward Pau Victor te chu season chawhnu atan an la ziak lut thei rih lo a, player pahnih hma hun a chiang ta lo hle.

Kum 26 mi Olmo hi Barca hian RB Leipzig aṭangin euro maktaduai 60 bawr velin an la lut a, coach Hansi Flick-a hnuaiah player pawimawh a ni. Pau Victor hian Girona aṭangin Barca hi loan-in a zawm bawk a, bench aṭanga a luh a tam zawk.

La Liga-in club inrelbawlna khauh takin a kalpui a, an sum lakluh mila player ziah luh theih zat an bituk sak. Olmo leh Victor ten Barca an zawm khan December thleng ziah luh an ni a, tuna ziah luh leh an tum a, a theih ta lo.

Spanish Football Federation (RFEF) leh La Liga chuan thuchhuah inṭawm siamin, Barca ngenna anga player pahnih chu ziah luh theih a nih loh thu an sawi a, chutihrual chuan, "Barca hian an sum dinhmun an siam ṭha a, a lawmawm hle. Mahse, player ziah luh tawh, an hming thai bo leh chu season khatah ziah luh nawn theih a ni lo," an ti!

Barcelona hian player pahnih hi an squad-a an tel theih nan court pahnih an dawr tawh a, mahse, an dilna hnawl a ni tawh. Player pahnih hi ziah luh ngei tumin Spanish sorkar an dawr leh mek nia sawi a ni.

Hetiang boruak karah hian Dani Olmo chu chhuak mai tura sawi thawm a awm a, Liverpool nen an sawizawm mek.