Jordan khumtu James

LeBron James chuan legend Michael Jordan-a sulhnu ropui tak zinga pakhat a khum leh ta. NBA huangah James hian point 30 neih tlin ngun lamah Jordan hi a lehpel a ni.

Kum 40 mi James hian Los Angeles Lakers leh Atlanta Hawks inkhelah point 30 a nei a, a team hi 119-102 in a chakpui. James hian basketball inelna lianah match khata point 30 neih tlin hi ṭum 563 a nei ta a, kum 2003 a Jordan-a record lo siam chu a khum.

NBA match khelh tam lamah pawh James hi palina a ni ta chiah, ṭum 1,523 inlan tawhin Dirk Nowitzki a khum. A chungah hian Robert Parish (1,611), Kareem Abdul-Jabbar (1,560) leh Vince Carter (1,541) te an la awm thung.

Lakers star James chuan, "Player ropui bikte nena ka hming an han lam ri ve ṭhin hi chu ka lawm, ka tan chuan chanhin lawmawm leh sawi nuam a ni, ka naupan lai aṭanga ka mi ngaihsan tak takte huanga tel ve chu a hlu takzet," a ti.

Inkhel dangah Oklahoma City Thunder an chak zel, a zawna vawi 14 an chak zawnna ni turin New York Knicks chu 117-107 in an hneh a, quarter thumna an khelh zawhin 88-80 in hniam zawk mah se hun tawp dawnah team ṭha an nihna lantirin an chak.