A chung berah Napoli

Antonio Conte enkawl Napoli chuan Inrinni zan khan Fiorentina chu 3-0 in an hneh a, Serie A match 19 aṭanga point 44 hmuin a chung berah an awm chhunzawm.

Stadio Artemio Franchi-a inkhelah Napoli tan hian David Neres, Romelu Lukaku leh Scott McTominay ten goal khat ṭheuh an khung a, mualneitu lamin a chhanletna tur an nei lo.

Napoli hian anmahni hnaih bertu Atalanta aiin point thumin an hmu tam zawk, chutihrualin Naples club hian match khatin an khel tam thung a, an point hmuh zat hi inang leh thei chu a la ni.

Inkhelh banah Conte hian chanchinbumite a hmachhawn lo a, a aiawh turin assistant manager Cristian Stellini a inlantir thung. Stellini chuan, "Hnehna kan chan avangin kan lawm, chutihrualin kan club ṭan em emtu Young Daniele a boral tih kan hriat avangin kan lungngai bawk.

"Daniele kha kum 13 mi chauh a la ni a, vanduai thlak takin leukaemia vangin a thi," a ti. Napoli president Aurelio De Laurentiis pawhin Daniele-a thihna chu pawi a tih thu leh, a kalsan tak a chhungte an tawrhpui thu a sawi ve bawk a ni.