BBC Sports Personality of the Year Tyson hming a chuang chhunzawm dawn

WBC world heavyweight boxing champion Tyson Fury chuan BBC Sports Personality of the Year nominee aṭanga a hming paih turin ngen mah se a dilna hi tih hlawhtlin a ni dawn lo. 

BBC hian December 1 zan khan Sports Personality of the Year chawimawina dawng thei tur hming paruk an chhawp chhuak a, hming chhawpchhuah zingah Fury a tel. Mahse, kum 32 mi boxer chuan, "BBC hnenah an nominee aṭanga min paih turin ka ngen duh a, mipui tan champion ka nih avangin ka nihna fiah turin eng award mah ka mamawh lo. 

"Tu nge ka nih ka inhria a, infiamna khawvela ka hnathawh pawh ka hria. Mipui hmangaihna ka dawng nasa em em a, chumi hlutna chu award-a hrilhfiah chi a ni lo," a ti. 

BBC Sports Personality of the Year hi British infiammite puala siam a ni a, Fury bakah hian award dawng thei tur hian kum 2020-a che ṭha infiammi dang panga chhawpchhuah an ni. 

Cricketer Stuart Broad, jockey Hollie Doyle, Formula 1 driver Lewis Hamilton, footballer Jordan Henderson leh snooker star Ronnie O'Sullivan-te chu chawimawina dawng tura Fury elpui turte an ni. 

Mahse, BBC thupuangtu chuan, "Nominee-te hi independent expert panel-in phochhuah tlaka a ngaihte a phochhuah an ni a, hemi a nih ang tak hian Fury hi BBC SPOTY 2020 list-ah a awm chhunzawm ang. 

"Chawimawina dawng tur hi mipui vote hmangin, live show-ah thlan a ni dawn a, programme-a a tel duh leh duh loh erawh Tyson-a thu thu a ni," a ti. 

December 20-ah vote thlak theih a ni dawn a, BBC television channel BBC One-ah live-in vote thlak a ni ang - SPOTY aṭanga paih tura ngentu Fury hian amah duhsaktute chu amah vote lo turin a ngen hial. 

Vote thlak dan tur hi show-ah puan a ni dawn a, phone emaw online kaltlanga vote hi thlak theih tur a ni ang. BBC Sports Personality of the Year bakah hian chawimawina dang pawh sem a ni. Team of the Year, Coach of the Year, World Sport Star of the Year leh Unsung Hero-te chu chawimawina sem tur langsar dang an ni a, ngaihven a hlawh leh khawp ang. Manchester United forward Marcus Rashford chu a bik taka chawimawina pek a ni dawn a, kum 23 mi striker hian Covid-19 karah ei tur nei lo naupangte tan nasa takin hna a thawk a, hei vang hian chawimawina hi pek a ni dawn. 

Stuart Broad (Cricketer) 

Kum 34 mi cricketer hi nipui laia West Indies nena test series an neihah opening match atan thlauh thlak a ni a, mahse, test match hnuhnung pahnihah a lo kir - wicket 16 rawn lain test cricket-ah wicket 500-a la tling a, test cricket-a wicket 500 la tling thei pasarihna a ni. 

Hollie Doyle (Horse Racing)

October 14, 2020 khan Doyle hian season khata a vawi 117 chakna a tawng a, sakawr intlansiaka British hmeichhiain season khata hnehna an chan hnem ber record (116) ama lo siam tawh, kum 2019 ami chu a khum. Sunday Times Sportswoman of the Year-ah thlan a ni tawh a, Royal Ascot-a a vawi khat chak tawngin, kum 24 mi a ni.

Tyson Fury (Boxing)

Gypsy King hming lem an pek boxer hian February khan WBC heavyweight title la turin Deontay Wilder-a hneh a, kum 32 mi boxer-in rilru buaina leh damdawi ngawlveina kalsana a hlawhtlin lehna hi mi tam tak tan thawnthu ngaihnawm a la tling reng. 

Lewis Hamilton (Formula 1)

F1 chanchina driver ropui ber pawl hian tuma tluk rual loha ngaih Michael Schumacher-a record nihrualin a vawi sarih nan world champion a ni a, a zawna F1 champion vawi li a nihna a tawng bawk. Kum 35 mi driver hian Grand Prix-a vawi 91 chak thei Schumacher-a chak record chu vawi 94 chakin a khum bawk. 

Jordan Henderson (Football)

Kum 30 mi Liverpool captain hian kum 1990 hnua a vawi khat nan England chu Premier League-ah point 19-a sang falin a champion pui a, a hma kum lawkin Champions League-ah nomawi a chawipui bawk. England tana vawi 58 inlan thei midfielder hi Football Writers' Men's player of the year-ah thlan a ni.

Ronnie O'Sullivan (Snooker)

Kum 2020-ah a vawi ruk nan world champion a ni a, kum 44 mi niin, kum 40 chuang World Snooker Championship-a champion thei upa ber record a siam bawk. A career (kum 28) chhung zawngin prize money-ah ringawt pound maktaduai 11.6 a hlawh chhuak tawh a, snooker-ah ani aia prize money hlawh chhuak hnem an la awm lo.