Maradona leh Naples zunleng

Diego Maradona a thi a, khawvelin a sun. Football legend a liam rualin ropui taka a khelh tawhna Napoli chu mi tam tak rilruah a lo lang. Italian club chuan, "Khawvelin eng thu nge kan sawi an ngaichang tih kan hria, mahse kan rilru nat zia hi thuin a sawifiah lo. Tun hi lungngaia sun hun a ni," tih bak sawi tur an hre lo.

Italian club hnuai hnung zinga mi ni ṭhin Napoli hian khawvel barakhaihin Maradona an lalut a, player an lei tawh zingah fuh ber a nih zia sawi nawn a ngai lo. Club fans tam tak tan Diego hi pathian a ni a, an sakhua chu 'Maradona' a ni bawk.

Serie A club Napoli FC hi Naples khawpuia innghat a ni a, tun hma chuan Italy ram khawpui rethei an sawi zinga mi a ni satliah mai lo - European huap pawha an hming lanna chu an retheihna a ni hial!

Italy hmar lama khawpui awm Milan leh Turin khawpui te an hausa a, an GDP pawh Naples aiin a let thawkin a sang zawk. Sum tamna khawpuia innghat football club AC Milan, Inter Milan, Roma leh Juventus-te chuan Italian football an thunun hneh hle.

Naples khawpuiah mihring an rethei a, rukruk a hluar. Rethei viau chungin ruihhlo a tam a, Italian club ṭhenkhat chuan rukruk ching an tam avangin Napoli fans chu an stadium-a inkhel en turin ticket an pe ṭha duh lo hial niin an sawi.

Khawvel huap pawhin Juve, Milan leh Inter-ten sum an ngah a, an ram chhung mai bakah European football-ah pawh an hming a chungnung. A bik takin an ram league-ah chuan club dang tan hmun a awm ve lo, a nihna takah chuan club rethei tan kawl a êng ve mawlh lo.

Naples khawpuia football ngainatute hian Barcelona-ah player thiam bik a awm a, a hming chu Diego Maradona a ni tih an hria. Argentine midfielder hian Boca Juniors aṭangin Catalan club hi 1984 khan pound maktaduai 5 in a zawm a, khawvel player manto ber a ni.

Napoli fans tan Maradona lakluh chu ngaithuah ngam chi a ni lo a, an mumangah an hmu a nih pawhin an awih lo hial ang. Nomawi chawi aia retheih lar puitu club ṭantute tan Maradona lakluh suangtuah chu thil atthlak mai a ni ang.

Mahse maw, a thiam chungchuan vanga hriat hlawh Maradona chuan Italy a pan dawn tih thawm a ri tlat. Mi zawng zawng rilruah Milan, Inter nge Juventus a pan ang tih chu zawhna a ni - Napoli an lang phak lo.

Khatih hunlaia Serie A club vantlang ni phak meuh lo Napoli khan khawvel player manto ber ni turin pound makatduai 6.9 zetin Maradona an lalut tlat - thil thleng thei lo an thlentir - 'risk' an la nge retheih zual phah an huam, tih chu zawhna a tling.

Khawvel barakhaihin Napoli-in Maradona an lalut a, Italian club dangten an 'thik' a, chanchinbu lam tan chaw tui a nih rualin an mak tih a ni ve bawk. 'Maradona chuan Napoli-ah eng nge a va tih ang?' tih chu an zawhna siam langsar tak a ni.

Italy chhim lam Italian Peninsula, Mediterranean tuipui hnaih lam club-te hian Italian league nomawi an la chawi ngai lo a, a nihna takah chuan Napoli leh Maradona hi an in 'risk' tawn a ang ber.

Maradona thiamna leh theihna san zia hre chiangtu Naples mipui erawhin an ringhlel eih lo. 'Chhandamtu a lo thleng ta' tih chu an thupui a ni. Argentine midfielder hian Italian club a zawm satliah lo a, player ṭha dang lalut tel turin inremna an lo siam reng si.

Kum 1985 July 5 khan Stadio San Paolo-ah player thar Maradona chu pho chhuah a ni a, an player thar lawm turin mipui 75,000 zet an pungkhawm, ṭhahnem tak an ni. Napoli tan goal a khung chu sawi loh, ball a pet hmain fans an lungawi nghal a ni ber.

Maradona an neih vanga Naples khawpui lawmna chu thua sawifiah chi a ni lo a, Napoli player-te pawhin inrintawkna an neih belh ngei ang tih chu thil chiang sa a ni. Tun hma lama midangte chung entu ni ṭhin khan mei an khup duh tawh bik lo.

Hun rei lo te chhungin Mardona chu fans ngainat leh lawm ber a ni nghal a, defender ropui Giuseppe Bruscolotti hnen aṭangin captain nihna a chhawm zui nghal - khelmual chhung leh pawn lamah pawh an hotupa a ni.

Italy chhim leh hmar lam inep nat lai a ni a, sum leh pai bakah ei leh bar chungchangah chhim leh hmar hi an inep na hle. An inelna hi pawn lamah uchuak taka tarlan chi a ni lo, an lantir theihna langsar chu khelmualah a ni thung.

Maradona kaihhruaina hnuaiah Napoli hian 1986-87 khan Serie A nomawi an chawi ta luah mai! An duhthusam, mumang rama an hmuh ṭhin, mahse a tak thleng thei ngai lo tur kha a takin an tawng ta miau si.

Football atchilhna ram a ni a, anmahni aia lian leh ropui zawk an awm avangin Napoli hi club lian dangten an hnuaichhiah ṭhin. Tunah zet zawng Maradona hoa an champion tawh miau avangin tumah an hlau tawh bik lo.

Champion lawmna chuan Naples khawpui a chiah hneh hle a, kawtthler leh hmun remchang lai apiang mai chu 'champion party' neihna hmun a ni nghal zel, kar khat aia rei zawk khawtthlerah lawmna an nei hial.

Naples khaw mipui ngaihdan chuan '1987 hian Italy roreltu thar a piang' tlat a ni. An chunga leng ṭhin Juventus, Milan leh Inter Milan te an tihel a, an hmelma club lian dangte an hlau bik tawh lo - Maradona an nei tawh miau a lawm.

Kawtthler leh in bangahte chuan Maradona lem an ziak chiai chuai a, a hunlaia nau piangte chuan an hmingah an pu zui nasa hle bawk. 1989-90 season khan league nomawi an chawi leh a, a hmasa aiin a hlutna a la nep chuang lo.

Famkim lohna khawvela cheng a ni a, football khelmualah chuan roreltu leh sawisel bo ni mah se mimal nunah erawh Maradona hian buaina leh harsatna hrang hrang a nei ve tho - ruihhlo chi khat cocaine a tih chuan a nun a tibuai hle.

Ruihhlo ngawl a vei miau a, zan lamah rei tak rak rui chunga a men avangin a tûkah a chau a, training neih mumal loh leh buaina neuh neuh a neih fo avangin a khelhna Napoli pawhin pawisa an chawitir a ngai hial.

Cocaine avang hian kum khat aia rei, thla 15 chhung ngawt inkhel thei lo tura hrem a tawk zui! Hreh tak chungin Napoli leh Maradona an inṭhen a ngai a, club lian Real Madrid leh Marseille ten an ngaihven karah Sevilla a pan.

Maradona hi chhuak tawh mah se a sulhnu leh thil tih ten Naples khawpui a la chhuahsan ve chuang lo. An duh, beisei leh duhthusam Italian champion nomawi lâkpuitu a nih maiu avangin an haw phal lo. A jersey hak ṭhin 'Number 10' chu tuma hak theih tawh loh turin an dah ṭha 'retire' ta hial a ni.