Copa America Chile-in quarterfinal lut

Thawhṭanni zing khan Chile leh Mexico te chuan Copa America an group match hnihna khelin goal thum ve ve khungin an inhnehtawk. Chile hian an match hmasa berah Ecuador an hneh tawh avangin point li hmuin quarterfinal an lut.

Chile tan Juventus midfielder Arturo Vidal chuan goal hnih a khung bakah Eduardo Vargas chuan goal khat a khung bawk. Mexico striker Matias Vuoso chuan goal hnih a khung bawk a ni.

Chile khawpui Santiago hmuna inkhelah hian a tirah chuan inkhel boruak a hniamin a dul hle. Mahse, Mexico tan minute 21 na a Vuoso-a'n goal a khung aṭangin game a nung thar.

Kum 33-a upa Vuoso goal kan hmuh rual deuhthaw hian Vidal-a goal kan hmu zui nghal zat. Tun season-a Juve champion nomawi pahnih chawi puitu Vidal hian Charles Aranguiz ball cross ṭha tak mai chu minute 22-ah a tauh lut zui ve nghal.

Team pahnih an phur thar, goal venhim aiin goal khung belh tumin an inbei zui. Mexico lamin an corner hmuh chhawr ṭangkaiin Gerardo Flores-a'n ṭha takin lo tauh mah se Chile goalkeeper Claudio Bravo-a'n a lo dan sak. Ball lo per let leh hi Raul Jimenez chuan chep tak aṭangin a tauh lut. Jimenez-a goal hi minute 42-ah Vargas chuan sut ve lehin 2-1 in chawlh lawk an hmang.

Chile-in point khat pawh an hmu a nih chuan quarterfinal an lut dawn a ni tih hre mah se Jorge Sampaoli-a nauten chak result nen ngei quarter-final luh an tum. Second half ṭan hnu lawk minute 55-ah Vidal chuan ama penalty hlawh chhuah aṭangin he inkhelha a goal hnihna a khung. He inkhelah hian Vidal hi a langsar hle a, goal hnih a khung bakah Vargas goal thun tur a siamsak bawk.

Mexico an beidawng duh bik lo, Adrian Aldrete-a through ball ṭha tak dawngtu Matias Vuoso chuan Bravo dan theih loh in Chile goal-ah a khung.

An inkhel thlirin goal dang a luh belh ngei tura a lan laiin goal kan hmu zui tawh lo. Arsenal forward Alexis Sanchez chuan chakna goal khungna hun ṭha nei mah se Chile goal li na a khung thei lo.

Eng nge an sawi?

Mexico coach Miguel Herrera chuan, "Goal khung mah ila goal kan chhuah ve zel chuan point hmuh a har ṭhin. Second half-ah kan khel ṭha hle, chak tur pawhin hun ṭha kan nei mah se point khatah kan lungawi a ṭul si. Kan match hnuhnung berah kan chak a nih chuan quarterfinal kan la luh theih avangin chak loh a thiang tawh lo," tiin a sawi.

Goal hnih khunga a ṭhiante goal thun tur siamsak bawktu Vidal chuan, "Kan khingpuite kha an khel ṭha em em a, ball an thiam bakah an che rang em em bawk. Tunah hian quarter final lut tawh mah ila kan inthlahdah thei lo ang, table chung bera awm turin Bolivia lakah hnehna kan chan ngei a ṭul," tiin a sawi.

Colombia Vs Brazil

Ningani zing dar 5:30 hian Brazil leh Colombia ten an match hnihna an khel ang. Colombia hian an match hmasa berah Venezuela chu 1-0 a an hneh loh avangin quarterfinal lut turin point hloh a hun tawh lo hle ang.

Ram pahnihte hi tunhmain vawi 27 lo in hmachhawn tawhin Brazil an chungnung hle a, vawi 17 zet hnehna an chang tawh.

Brazil hneh tur chuan Colombia tan Real Madrid star James Rodriguez bakah Monaco striker Radamel Falcao te an chet ṭhat a ṭul tawh ang. Falcao hian Venezuela an hneh loh hma khan an ram tan a zawnin match thum chhung goal a khung thei.

An inkhelh tur thlir lawkin Ro­driguez chuan, "Brazil nena inkhelh hi engtik lai mahin a awlsam ngai lo. Tun ṭumah pawh hian a harsa dawn tih chu a chiangsa. Mahse, kan tan chuan hnehna chan hi thil theih loh a ni lo ang. Goal khung turin kan nawr dawn a, kan mamawh point thum pawh kan hmuh ngei ka ring," tiin a sawi.

Colombia attacking midfielder Rodriguez hian nikum FIFA world cup-ah khan match nga a khleh aṭangin goal ruk khungin Golden Boot a dawng.