UEFA-in Croatia buaina chhui chiang

Euro 2016 qualifier kar hmasa Zirtawpnia Croatia leh Italy-in an khelh ṭumin field chhungah Nazi Germany hunlaia an chhinchhiahna (swastika) mi ṭhenkhatin an lo ziak a, midang hmuhsitna leh tih elna rawngkai a nih avangin UEFA chuan he thil thleng hi chhuichiang turin hma a la ṭan.

UEFA thupuangtu chuan kha thil thleng duhawm lo tak kha an ngaihtuah nghal thu sawiin, July 16-ah an zirchianna te sawi ho a he inkhel thlengtu Croatian Football Federation chunga hmalak dan tur an ngaihtuah tur thu an sawi.

Croatian Football Federa­tion chuan Italy an mikhual ṭuma thil thleng chu an tan thil mualpho thlak tawpkhawk leh an ram hmai tibaltu a nih thu an sawi.

He thil thleng vang hian Croatia president Kolinda Gra­bar-Kitarovic pawh ṭawng­chhuakin an ram leh Italy in­khelh ṭuma thil thleng chu an chhui chian nghal tur thu a sawi a, mi ṭhenkhat chet duh dan chu tehkhin rual loh khawpa an ram hmai tibaltu leh hmingṭhatna thaibotu thil duhawm lo tak a nih thu a sawi a ni.

Croatia fan-te hian nung­chang mawi an tlachham ve hrim hrim. Nikum November-a San Siro khelmuala Italy tum tura an zinchhuah ṭumin an fan te'n field chhungah mei alh leh thil dang an vawmluh vangin vawi hnih lai inkhel tihtawp a lo ni tawh a, police inrawlh a ngai hial.

San Siro-a an chet dan avang hian Croatia team hi Nor­­way nen an inkhelh ṭumin stadium kawngkhar ṭhenkhat chiah an hawnsak. Mahse, heti chung hian fan awmchhun te'n buaina an siam leh tho a, Italy nen an inkhelh ṭum khan entu awmloa inkhelh tir an ni.

Entu awm lo chung pawhin inkhel ṭan hmaa fan ṭhenkhat thil tih avangin Croatia hi an buai leh ta tho a ni.