Wilshere-a goal mawlh kha

England-in Pathianni zan khan Euro 2016 qualifier-ah 3-2 in Slovenia an hneh a, Arsenal midfielder Jack Wilshere-a goal ropui pahnihin sawi zui a hlawh hle.

Wilshere leh goal

Kum 23-a upa Wilshere hi England team-ah mi thar a ni tawh lo a, mak angreng tak chu ram tana match 28 a khelhnaah goal a khung chauh.

Arsenal midfielder hian kum 18 leh ni 222-a upa a nihin ram tan a khel ṭan a, England tana khel thei player zingah amah aia naupanga bul ṭan thei hi pakua chiah an awm.

Wilshere hi goal khung thei tak player a ni lo a, Arsenal tan vawi 100 a inlan tawhah goal ruk chiah a la khung. England midfielder hian ram tana a goal khung chhanah defensive midfield hna a chelh chu a pawimawh tih a sawi.

England midfielder chuan, "Kan team-in kan attack chuan midfield-ah hna pawimawh tak ka chelh a ni. Hetiang hunah chuan goal venhim ringawt kha a ni tawh lo a, counterattack aṭanga min nawr let tur kha ka ven a ngai a. Uluk takin game kalhmang chhut a ngai a, box pawnah petna hun remchang nan tumin ka tlan ṭhin bawk," tiin a khelh dan hmang a sawi.

Slovenia an hmachhawn ṭumin Wilshere hi England midfield-ah Jordan Henderson leh Fabian Delph te hnungah a awm a, Dublin-a Republic of Ireland nena an inhnehtawk ṭumin Arsenal midfielder hi Henderson leh James Milner te hnungah a awm bawk.

Goal ropui a ni

England captain hlui Gary Lineker chuan, "Jack Wilshere goal pahnih kha a ṭha dun khawp mai, ball kha a kalna ngaiah chiah a kal. England goal ropui 10 thlang chhuak ila, Wilshere goal kha chu a tel khawp ang," tiin Wilshere a goal a fak.

Midfielder leh goal

Lineker chuan, "Roy Hodgson tana buaithlak chu England midfielder zingah goal khung thei an tam lo hi a ni. Frank Lampard, Steven Gerrard leh Paul Scholes te khan ram tan goal an khung thei a, Wilshere hian a chhunzawm a ngai a ni," tiin goal khung thei midfield an pawimawh thu a sawi.

England coach Roy Hodgson pawhin, "Midfield aṭanga goal khung kan ngai pawimawh thu Slovenia kan tum hma khan kan sawi a. Chumi thei tur chuan midfielder kan nei ṭha tawk a ni. Wilshere, Henderson, Delph, Adam Lallana leh James Milner te kan nei a, tlar hmaah ringawt kan ingnghat tur a ni lo," tiin a sawi.

Pathianni inkhelh hma khan Eng­land midfield laia awm Wilshere, Fabian Delph leh Jordan Henderson te khan a belhkhawmin ram tan vawi 53 an khel tawh a, goal an la khung lo.

England tana goal khung tam ber Sir Bobby Charlton khan midfield aṭangin goal 49 a khung a. Tun hnaiah Frank Lampard-a'n match 106-ah goal 29 a khung a, Steven Gerrard-a'n match 114-ah goal 21 a khung ve bawk.

David Platt khan 1989 leh 1996 inkar khan goal 27 a khung a, Bryan Robson-a'n ram tan kum riat a khelh chhungin goal 26 a khung ve bawk. England captain hlui David Beckham-a'n goal 14 a khung a, Manchester United midfielder hlui hian World Cup pathumah goal a khung.

Tuna England midfielder zingah goal khung tam an awm lo. Andros Townsend-a'n goal thum a khung a, Wilshere-a'n goal hnih a khung a, Milner-a'n goal khat chiah a khung. Aston Villa midfielder Delph leh Liverpool midfielder Henderson ten goal an la khung lo.