Petr Cech leh Arsenal inhnaih

Chelsea goalkeeping coach Christophe Lollichon chuan Petr Cech-a'n tun nipui transfer-ah Chelsea a chhuahsan dawn a nih chuan Arsenal a pan a rin thu a sawi.

Kum 33-a upa Chelsea goalkeeper Cech hian Premier League champion tan hian hmun nghet a chang tawh lo a, tun season liamtaah pawh khan Thibaut Courtois lakah a dinhmun a hloh tawh.

Chelsea hian an goalkeeper hi chelh thei dawn lo mah se an elpui club Arsenal laka hralh erawh an duh lo hlein a rinawm. Amaherawhchu Czech Republic international Cech hian Gunners zawm a duh nia sawi a ni.

Chelsea goalkeeping coach Lollichon chuan, "Club lian tan chuan goalkeeper ṭha pahnih neih a ngaih avangin Cech leh Courtois neih kawp hi chu a ṭul. Mahse, Cech te anga player ṭha tan chuan inkhel lo a awm reng chu a harsa ṭhin. Chuvangin hmun a chan theihna tur a ngaihtuah pawh hi a awm lo hran lo," tiin a sawi.

Arsenal a pan a rin chhan sawiin Lollichon chuan, "Cech hian England a cham zel hi a duh bakah Premier League khelh zel hi a la duh bawk. An chhungkua a hlim taka an awm theihna London chhuahsan hi a hreh bawk avangin London club lian dang Arsenal hi a pan ka ring ber. Club tam takin lakluh duh mah se Cech tan chuan champion theihna tur club zawm hi a fuh dawn a ni. A kum tam deuh tawh mah se kum thum aṭanga kum li vel chu ṭha takin ala inkhel thei ang," tiin an goalkeeper chungchang a sawi.