Grealish-a'n chawlh a hmang nuam

Aston Villa midfielder Jack Grealish chu khawlaia a mu lai thlalak a darh nasat avangin Villa chuan inbiakna neihpui an tum. Spain thliarkar lar tak pakhat Tenerife-ah Grealish hian chawlh a hmang mek a, a chawlh hman­na lamah hian a che na deuh niin a lang.

Birmingham khaw club Aston Villa chuan thuchhuah siamin, "Jack Grealish-a thlalak darh mek hian club hruaitute min barakhaih hle. Rei lo teah player hi meeting kan neihpui anga, kan thutlukna erawh club chhungkaw bakin an hre lo ang," tiin club chhungkaw thil puandarh vak an tum loh thu an sawi.

Kum 19-a upa midfielder hi a nungchang vangin April thla khan Villa boss Tim Sherwood chuan a lo zilh tawh a, ruihhlo zukna pipe hmanga a zu lai thlalak a darh vang a ni nghe nghe.

Villa rawlthar beiseiawm tak Grealish thlalak hi Briony King tih hming pu in twitter-ah a pholang a, season hmasa a Villa tan match 24 lai inlan thei midfielder hi rui lutuk leh, mahni pawh insaseng thei lo angin a ziak a ni.

Grealish erawh chuan thlalaka an tarlan chu amah a nih loh thu a sawi ve thung.