Capello dinhmun a chiang lo
Russian Football Union president Nikita Simonyan chuan an ram team enkawl mektu Fabio Capello chu a hna aṭanga an chawlh tir maitheih thu a sawi.
Simonyan hian a thusawi hi Pathiannia Austria laka 1-0 a an tlawm hnu lawka a sawi a ni a, Capello-a'n Russia a enkawl zel dawn leh dawn loh chungchangah zawhna a awm mek thu a sawi bawk.
Euro qualifier-ah Capello a enkawl Russia hian besei an phak lo hle a, Group G-ah pathumna ni mekin hmahruaitu Austria aia an hniamna hi point riat niin pahnihna Sweden aiin point liin an hniam bawk.
Kum 68-a upa manager hian July 2012-ah Russia enkawl hna hi a thawk ṭan. January 2014 khan kum li dang cham turin contract a ziak leh a, World Cup 2018 Russia-in an thlen turah Russia team kaihruai tura beisei a ni. Mahse, tuhnaiah beisei anga a team a chet ṭhat pui leh tak loh avangin Capello dinhmun hi a chiang leh ta lo.
England manager hlui Capello hian Russia hi a chet ṭhat pui hran lo hle, World Cup Brazil 2014-ah khan group stage-ah tla in team hneh pakhatmah an nei lo a, Euro 2016 France-a khel thei tur chuan play-off an khelh a ngai tawh dawn.