Hmeichhe World Cup German ral a lian, Norway an vul

Hmeichhe World Cup Group stage hmawr an bawk hnai tawh a, group ṭhenkhatah chuan last 16 lut tur a chiang tawh.

Thawhṭanni zing khan Group B-in an match khelh tur an zo a, inelna chhunzawm zel turin he group aṭang hian Germany leh Norway an tlang.

Germany leh Thailand inkhelah German hmeichhe team-in an goal nawr nat zia an tilang leh a, Ivory Coast 10-0 a sawp tawhtu team hian 4-0 in Thailand an sawp.

Thailand hmeichhe team-in first half-ah defensive game ṭha takin khel mah se German ral lian second half-ah an dang zo lo.

First half-a Melanie Leupolz goal khat khung chu substitute striker Lena Petermann chuan goal hnih a tauh luh hmanga rawn chhunzawm ve lehin Thailand hmeichhe beiseina a lu hmangin a thaibo sak. Sara Daebritz chuan goal khat dang hun tawp hnaih lamah a rawn belh ve leh bawk a, Germany-in group stage-ah ro an rel chiang hle.

Norway pawh an tlang e

Thawhṭanni a inkhel dangah Ada Hegerberg goal hnih thun chhawr ṭangkaiin Norway-in 3-1 in Ivory Coast an hneh a, last 16 an lut chiang.

Norway tan Hegerberg bakah Solveig Gulbrandsen chuan goal khat dang khung ve lehin Ivory Coast tana Ange Nguessan-i goal ropui in awmzia a nei lo.

Group A hmahruaitu

Canada an tlang

World Cup thlengtu Canada-in nimin khan Netherlands chu 1-1 a inhnehtawk puiin second round an inhlangkai. Inkhel ṭan aṭanga minute 10 na lekah Ashley Lawrence chuan Canada tan goal hmahruai khungin rei tak chhung Canada-in hma an hruai.

Mahse, inkhel tawp nan minute nga chiah a awm tawh tihin Kirsten van de Ven struck chuan Netherlands tan an siphurh a rawn sut a, 1-1 in inkhel an ṭin.

Netherlands-in huntawp dawn hnaiha an goal khung an la vanneih pui thei, Group A-ah pathumna ni mah se goal difference hmanga an chung chiaha awm China pha lo an nih avangin group stage-a pathumna zinga che ṭha ber an nih avangin an la tlang thei tho.

Group A inkhel dangah China hian New Zealand chu 2-2 a inhnehtawk puiin anmahni ang tho a point li hmu Netherlands aia an goal difference a ṭhat zawk avangin second round an lut.