Premier League-a kal tur Firmino

Lammualah Roberto Firmino a inlan tawh a, Hoffenheim midfielder agent chuan Firmino hi season thara Premier League club tana a khelh tur thu a sawi.

Kum 23-a upa Firmino hi Bundesliga club Hoffenheim tan match 153 khel tawhin goal 49 a khung tawh a, club tana a khelh ṭhat avangin Brazil coach Dunga hnuaiah ram tan player pawimawh a ni.

Firmino agent Roger Wittmann chuan, "Ka sawi theih chhun chu England-ah a kal dawn tih hi a ni," tiin a sawi.

Wittmann hian thu tam sawi lo mah se tun hnaia media ṭhenkhatin Manchester United leh Firmino an sawi zawm chu thuthang leng mai mai a ni lo tih a nemnghet.

Brazil midfielder hian Brazil Serie B club Figueirense aṭangin kum 2011 khan euro maktaduai liin Hoffenheim a zawm a, Germany-ah a cheṭha zui hle. Kum 2014 khan Hoffenheim-a cham zui zel turin kum thum daih contract a ziak a, amaherawhchu thuthang ṭhenkhatah chuan euro matkaduai 18 chuang hretin Dutch manager Louis van Gaal-a'n United tana khel turin a la lut niin an tarlang.

Firmino hian Brazil tan goal thum a khung tawh a, chakna goal vek a ni. Pathianni khan Copa America-ah Brazil-in Peru 2-1 in an hneh a, Firmino hian second half-ah Fred a thlak.