World Cup-a vawi hnih Brazil champion puitu Zito-a thi

Brazil midfielder ropui ṭhin Zito chu Thawhṭanni khan kum 82-a upa niin a boral a, a thih chhan hi puan chian a la niloin kum rei tak chhung chu stroke vangin a lo buai tawh.

World Cup 1958 leh 1962 champion team Brazil a an defensive midfielder Zito hi a hming tak chu Jose Ely de Miranda niin a vanglai hian BRazil tan vawi 52 lai a inlan hman.

Zito hian a ṭhatlai hun zawng zawng club pakhatah hmang zo vekin Sao Paulo khaw club Santos tan match 733 khelin goal 57 a khung. Santos-ah hian club captain te hial niin footballer ropui Pele te nen an khel ho ṭhin.

1958 World Cup-a Brazil champion nan a thawhhlawk hle a, defensive midfield-ah Didi nen inkawpin a hunlaia khawvel midfielder inkawp ṭha ber pawl nia sawi an ni ṭhin. Anni pahnih zarah hian Garrincha, Vava leh Pele te khan ropui takin Brazil tan an khelh theih phah ṭhin niin an sawi.

Kum li hnuah Zito a che ropui lehzual a, 1962 Chile World Cup-a Brazil chet ṭhat nan a thawh hlawk a, final-ah goal a khung nghe nghe. Hemi ṭum World Cup-ah hian Zito hi FIFA team of the tournament-ah a lang a ni.

Zito hian football a chawlhsan hnuin a vanglai hun a hmanralna Santos-ah director of football hna a chelh chhunzawm a, Santos-a lakluh tur player a enkual ṭhin.

A player hmuhchhuah zingah Neymar a langsar hle. Brazil captain hi kum 11 lek a nih laiin Santos-ah hian a lalut a, star ropui takah a chhuah thei.

Amah hmuchhuaktu Zito thih thu a hriat hnu lawkin Neymar chuan twitter lamah a ui thu a puangchhuak ve nghal a, an pahniha an thlalak dun tarlangin, "He pa hnathawh ropui te sawifiah tur hian thu in a daih lo. Ka tana a thil tih zawng zawng te avangin lawmthu ka hrilh a, Zito thlamuangin chawl ang che," tiin a ziak.

Kum 1958 World Cup final a Brazil XI zingah Zito a boral ve leh tak avangin Mario Zagallo leh Pele te chiah an dam tawh.