Ronaldo-a'n a goal 750-na a khung

Cristiano Ronaldo chuan a career-a goal 750-na a khung a, Champions League group stage match-ah Juventus chu Dynamo Kiev lakah 3-0 in hnehna a chanpui. 

Juventus tan Federico Chiesa leh Alvaro Morata-te chuan goal khat ve ve an khung bawk a, hmeichhe referee Stephanie Frappart chuan inkhel hi a kaihruai - hmeichhe zinga Champions League match referee hmasa ber a ni. 

Champions League Group G inkhel dangah Barcelona chuan 3-0 in Ferencvaros an sawp bawk a, Catalan club tan Antoine Griezmann, Martin Braithwaite leh Ousmane Dembele-ten goal khat ṭheuh an khung. 

Juventus leh Barcelona-te hi Champions League last 16 lut chiang tawh sa an ni a, December 8 zanah club pahnih hi an intawng dawn - an intawn hmasakah Barcelona an chak tawh. 

Juventus tan October 5-a Fiorentina aṭanga loan hmanga an hawh Federico Chiesa chuan minute 21-naah goal hmahruai a khung a, Ronaldo hian minute 57-naah a chhunzawm - Chiesa leh Ronaldo hian bar an tihper ve ve bawk. 

Real Madrid legend-in a career-a goal 750-a khung tlinna chiah a ni a, Juventus tan tun season-ah match riat khelin goal 10-a khung tawh. Kum 2018-a Juventus a pan hnuah match 97 khelhsakin goal 75-a la khung thei - kum 35 a ni tawh!

Ronaldo hian a career-a goal 750 khung tling tur hian Sporting Lisbon tan match 31-ah goal nga, Manchester United tan match 292-ah goal 118, Real Madrid tan match 438-ah goal 450-a khung a, Portugal tan match 170-ah goal 120-a khung tling bawk. 

Football la khel mek player zingah Ronaldo bakah Lionel Messi, Zlatan Ibrahimovic leh Robert Lewandowski-te chu goal 500 khung tling tawh an ni a, Messi hian goal 712-a khung tawh. 

Ronaldo-a'n a career-a a goal 750-na a khung a, hmeichhe referee Frappart-i'n inkhel a enkawl bawk avangin Morata-a'n a phu angin sawi zui a hlawh tawk lo. 

Spanish striker hian minute 66-naah an goal thumna a khung a, Ronaldo goal hi a siamsak a ni bawk - Morata goal khung hi goal hmahruai khungtu Chiesa siamsak a ni thung a, Chiesa hi Ronaldo goal khungnaah pawh a inrawlh.

Morata hian tun season Champions League-ah match nga khelin goal ruk a khung der tawh a, David Trezeguet (2001-02 season) hnua Juve tana Champions League group stage-a goal ruk khung leh thei hmasa ber a ni - inelna hrang hrangah match 12 khel tawhin goal kua a khung a, assist vawi li a nei bawk. 

Juventus boss Andrea Pirlo chuan, "Morata hi kum naupangtein Juve-ah a lo kal a, Madrid leh London-a tawnhriat ṭha zawk a neih hnuah a lo kir. Nuam a ti a, pressure a nei lo. Kan hnena khel tur khan kan duh em em a, kan chang thei hi kan lawm takzet a ni," tiin a striker a fak. 

Barcelona coach Ronald Koeman-a'n Pathianni zana Osasuna hnehtu Barcelona starting XI aṭangin Ferencvaros lakah player panga a thlak danglam a, Lionel Messi pawh chawlh hahdamna hun pek a ni. 

Messi awm lo mah se Barce erawh an talbuai phah lo - minute 14-na lekah Antoine Griezmann chuan mawi zetin an goal hmahruai a backheel lut a, Barca a pan hnua a vawi khat nan match thum chhung a zawnin goal-a khung ta. 

Dembele thawhrah sengin Braithwaite chuan an goal hnihna a khung a, Danish striker-in a match hnuhnung pathuma goal li a khungna chiah a ni ta bawk - Barca jersey hak a phu tih a pholan chhunzawm zel. 

Braithwaite-a'n penalty a hlawhchhuah chhunzawm a, a goal khung tur siamsaktu Dembele chuan awlsam takin goal-ah a chantir - Barca goal hi minute 28 chhunga lut vek a ni a, 3-0 in an chak.