Guam lakah India an mualpho
Stephen Constantine hnuaiah India-in 2018 FIFA World Cup Qualifier first round-ah Nepal hnehin bul an ṭan a. Second Round-ah Oman an hneh lo a, nimin khan ranking 174-na Guam lakah an tlawm zui.
Guam National Football Stadium, Hagatna-ah Matao (Guam koh duatna)-in minute 35-naah Brandon McDonald hmangin hma an hruai a, minute 62-naah Travis Nicklaw hmangin goal hnihna an khung.
India-in goal hnih an phurh aṭanga minute hnih hnuah Jackichand Singh aiah Jeje Lalpekhlua a lut a, injury time-ah captain Sunil Chhetri-a'n India tan khung mah se result a thlak zo lo. Guam 2-1 in an chak.
Turkmenistan hnehtu Guam-in India pawh an hneh e.
A ngai bawk
English coach Costantine-a'n Oman an hneh loh ṭuma starting eleven ngai bawk a hmang a, Lengpui tlangval Lalchhuanmawia'n ram tana koh a nih hnuah a zawnin starting eleven a chang.
Beisei pha lo India
Inkhel entu 4,253 hmaah India aiin Guam an chungnung a, Matao player-te hi India player-te aiin an tlan chak zawk a, Constatine-a naute hian chak an phu lo a ni ber.
Guam-in midfield an thunun a, Indian midfielder Eugeneson Lyngdoh leh Sehnaj Singh-te an che thei lo. Minute 34-naah Travis James Nicklaw-a'n goal net sir a pet per a, a goal teuh hle.
Minute li hnuah Guam-in goal an khung ta tho a, Ryan Guy long throw-in chu Brandon McDonald chuan a flick lut nalh hle. Halftime-ah Eugeneson leh Sehnaj aiah Cavin Peter Lobo leh Dhanapal Ganesh-te lut mah se, Guam bawk an chungnung zel.
Minute 64-naah India defence pherh vangin Travis Nicklaw-a'n Guam goal hnihna a khung. India dinhmun a khirh sawt a, beisei pha lo I League player of the Year Jackichand aia lut Jeje luh hnuah team pahnihin half chance an nei ve ve a, Mizo tlangval ball tauh chu Guam keeper Doug Herrick-a'n a dansak.
Injury time-ah India mualphona khuh mawi turin captain Sunil Chhetri-a'n goal khat a khung a, hun a tawp zui. Group D-ah FIFA ranking-a hniam ber Guam vawi hnih an chak tawh.
India hi September 8, 2015 khian team ṭha ber tura ngaih Iran nen Bengaluru-ah an inhmachhawn ang.
India an mualpho
Inkhelh ṭan hmain India coach Constantine-a'n ranking aṭangin a teh theih loh tih a sawi a, a sawi dik.
FIFA ranking-ah India leh Guam inkarah ram 33 zet an awm a, ranking aia ram pahnih inthlauhna chu ram chhunga mipui cheng zatah a ni. Guam hi thliarkar te reuh te a ni a, 2010 census aṭanga thlir chuan mi 159,358 chauh an cheng. Guam-a mipui awm zat hi 2011 census-a Aizawl District-a mipui awm zat 400,309 chanve a pha lo a, mipa awm zat 199,270 pawh a pha chuang lo! India population nen chuan khaikhin chi a ni lo.
World Cup a tawp
India-in chhiarkawp danin 2018 FIFA World Cup la khel thei mah se beisei ngam chi a ni tawh lo. Group khat aṭangin ram pahnih chiahin Third Round an lut dawn.
Amaherawhchu group mawngphaha awm pawhin 2019 Asian Cup qualifying play-off round an khelh dawn tho avangin Asia rama inelna lian ber khelh theihna kawng erawh a la inhawng ve zel.
Jeje thukhawchang
India striker Jeje chuan, "Kan result avangin coach a thinrim hran lo a, amaherawhchu player ṭhenkhatin I League an phak loh thu a sawi thung," a ti.
India tan hian I League player of the year Jackichand Singh a khel ṭha lo a; hetihlai hian Bengaluru-a starting eleven chang pha lo Sunil Chhetri-a'n Constantine hnuaiah match liah goal li a khung tawh thung.
Jeje chuan, "Guam player 10 hi USA-a khel an ni a, team chhia an ni lo. Inkhel pumpuia thlirin kan tluk lo a ni," tiin a hneh loh zawk thu a sawi.
Guam hian an ramah professional league ṭha an nei lo a, an player ṭhate hi ram pawna khel deuh vek an ni a, chu chu an chhawr ta a ni.