Bengaluru mualah Odisha FC

Indian Super League chu zanin dar 7:30-ah khelh chhunzawm a ni leh tawh dawn a, table-a pathumna ni mek Bengaluru FC chuan palina ni lai Odisha FC an mikhual dawn avangin inkhel boruak a sang ang. 

Bengaluru hian Sairuatkima leh Edmund Lalrindika chu Mizo an neih a ni a, Lunglei tlangval Edmund hian East Bengal chu loan-a a pan avangin Bengaluru squad-ah a awm tawh rih lo. Edmund hian East Bengal a pan hnua an match hmasa ber Kolkata derby a khel a, assist neiin a inhliam zui. 

Odisha FC hian Lalchhuanmawia Fanai, Jerry Mawihmingthanga leh Daniel Lalhlimpuia an kawl a, player pathum hi ISL club thar tan player ṭangkai ni phak vek an ni. Chhuantea hian hliam vangin season bul ṭan thei lo mah se ngai a awh chho ṭan tawh a, inenkawl lai a nih avangin bul ṭantir la ngam awm chiah lo mah se an match hnuhnung pahnihah bench aṭangin a lut ve ve. 

Ṭum dang ang bawkin Jerry chuan bul ṭan leh ngei tura beisei a ni a, season hmang ṭha tak Chanmari tlangval hi India coach Igor Stimac leh coaching staff dangten an rilruah an ngaihtuah ṭan tawh ang. Serchhip tlangval Daniel-a'n tun season-ah match 11 a khel tawh a, bench aṭangin a lut tam zawk.