Mizo pali telna Jamshedpur lehHyderabad inhnehtawk
Nilaini zan Indian Super League inkhelah Jamshedpur FC tan Mizo player an langsar a, mahse Hyderabad FC nena an inkhelah chak zo loin 1-1 in an inhnehtawk. Jamshedpur tan inkhelh zawha Winning Pass of the Match award dawngtu right back Laldinliana Renthlei leh left back Ricky Lallawmawma ten inkhel bul an ṭan a, bench-ah Isaac Vanmalsawma leh William Lalnunfela an awm bawk.
Hyderabad tan Aridane Santana chuan minute 50-naah goal hmahruai a khung a, hun tawp nan minute nga chauh a awm tawh tihah Stephen Eze chuan si phurh hi a sut - minute 60-naa luhtir, Kolasib tlangval William-a siamsak a ni.
Minute 60-na veka luhtir Isaac chuan goal an khung hma hian freekick ṭha tak a pet a, Hnahthial tlangval ball pet hi Peter Hartley chuan lo tauhin Hyderabad keeper Laxmikant Kattimani chuan a dang per - ball let lehlam hian Santana a per a, a goal.
Mahse, referee chuan season hmasaa Scottish Premiership club Motherwell tana khel Hartley hi foul-ah a ngai a, thutlukna mak tak siamin goal-ah a pawmsak lo. Mual dinglam sirah Dinliana a hmuhnawm tluan a, team pahnihin goal an khung hma, minute 24-naa Jackichand Singh-a'n goal-a a chantir theih tak lohte kha uiawm tak a ni.
Armed Veng South tlangval hian Hyderabad defender Akash Mishra kap kara ball a rawlh luh hnuah a tlan luhpui a, Jackichand tan a siamsak - mahse, Manipur winger hian goal-ah a chantir thei lo.
Zanin ISL inkhelah dar 7:30 hian Chennaiyin FC leh Bengaluru FC an inkhel dawn a, inkhel hmuhnawm a beisei ngam ang. Chennai club-ah hian defender Jerry Lalrinzuala, Lalchhuanmawia Fanai leh winger Lallianzuala Chhangte te an awm a, Chhuantea hi an match hnuhnung bera Kerala Blasters nen an inhmachhawn ṭumin hliam vangin lakchhuah a ni.
Chhuantea chuan, "Ka inenkawl mek a, hma chu ka ka sawn ve zel e. Mahse, ka la tlan thei lo a, training pawh ka la zawm loh avangin zanin chu ka inlan thei rih lo ang," tiin Vanglaini a hrilh a, Chennaiyin tan Jerry leh Lianzuala te bul ṭan tura beisei a sual lo ang. Bengaluru-ah hian goalkeeper Lalthuammawia Ralte, defender Joe Zoherliana, midfielder Emanuel Lalchhanchhuaha leh striker Edmund Lalrindika te an awm.