I Day Football 2016 Dar 12:00-ah Zo United Vs Lajong Dinthar hnehin Ramhlun North FC an invawrh
Vawiin chhun dar 12:00 hian Lammualah Zo United leh Shillong Lajong an inkhel dawn a, result hi club pahnih tan chauh ni loin Ramhlun North FC leh Dinthar FC tan pawh a pawimawh.
Nimin I Day Football inkhel hmuhnawm takah MPL kaithar Ramhlun North FC-in MPL1 champion Dinthar FC chu 2-1 in an hneh a, semifinal lut turin dinhmun ṭha takah an ding.
Group B club pali Shillong Lajong, Zo United, Ramhlun North leh Dinthar FC ten knockout stage an la lut thei vek.
Ramhlun N thawm a ring
Shillong Lajong laka mualpho Lalruatliana (Tawia) enkawl Ramhlun North an insiamṭha a, team ṭha zawka ngaih Dinthar FC an hneh.
First half-a goal a luh loh hnuah MPL kaithar tan MC Malsawmzuala'n minute 51-naah goal hmahruai a khung a, minute li hnuah Dinthar FC defender Lalremtluanga'n an lamah a tilut bawk. Goal hnih an chhuah hnuah Dinthar FC an ṭang thar a, Samuel Laltlanthanga'n mualpho khuhna goal a khung.
Ramhlun North hian second half ṭantirhah inkhel an thunun a, Ramhlun North right back Lalmalsawma freekick pet chu Dinthar keeper Lalrinhlua'n chhut sualin goal ban a per a, Siaha tlangval MC-a'n goal ṭha bik a khung. Hemi hnu hian Dinthar defender Remtluanga chuan yard 30 vel zeta hla aṭangin an lamah a pet lut a, keeper nena inhriatthiam tawk loh vang a ni.
Dinthar FC tlarhnung an talbuai a, Remtluanga kawppui Vanlalchhanhima'n an goal ban a pet per leh bawk!
Hun tawp lamah Dinthar an harhthar a, loan hmanga Hnahlan aṭanga an lakluh thar Lalramengmawia thawhrah sengin Samuel-a'n minute 75-naah a pet goal. Minute 15 inkhel hmuhnawm tak hmuh tur a awm zui a, goal erawh a luh belh tawh lo.
Eng nge an sawi?
Dinthar FC coach Lal-chhuan--awma chuan, "Kan khelh sualna em em hriat tur ka nei lo a, kan vanduai a ni. Shillong Lajong-in Zo United an hneh chuan beisei tur kan nei a, hun ṭha neih leh hram kan duh takzet a ni," tiin an thawhrimna chu thlawn mai atana a phal loh thu a sawi.
Ramhlun North coach Tawia chuan, "Dinthar kan hneh avang hian kan ṭha ta hluai tihna a ni lo. Amaherawhchu kan zir angin kan khel ṭan a, hma kan sawn hret hret avangin ka lawm hle. Kan tum pawh a la ngai reng a, khelh dan phung nghet neih kan duh a ni," tiin I Day Football-a chet ṭhat chu an tum ber a nih loh thu a sawi.
Engtin zel?
Shillong Lajong leh Zo United hi hneh loh la tawng lo ve ve an ni a, MPL club hian draw vawi hnih an nei tawh thung. I League club hian BVT hneh hram mah se Ramhlun North an sawp leh tawh avangin vawiin hian chak tura rinkai zawk chu an ni.
I League club hian hnehna an chang a nih chuan semifinal an lut ang a, Zo United hi Ramhlun North leh Dinthar FC ten an la umpha thei ang.
Chutihrualin Vanlalrova hote hi an chak a nih chuan semifinal an lut ang a, Dinthar FC leh Ramhlun North semifinal kalkawng a zim sawt ang.
Ramhlun North coach Tawia chuan, "Shillong Lajong-in kan lama an goal khungna kha kan tlarhnung tihsual vang a ni pakhat a, kan hneh ang chu ka ti lo nain khatiang em ema insawp tur kan ni lo. Hei vang hian Zo United hian Lajong hi an hneh thei a ni," tiin Group B club-te intluk tlan thu a sawi.
Result, Fixtures & Standing
Nimin Inkhel Result
Dinthar FC 1 - 2 Ramhlun North FC
DFC : Samuel Laltlanthanga 75'
CWFC : MC Malsawmzuala 51'; Lalremtluanga 55' (OG)
VAWIIN INKHEL TUR
12:00 PM Zo United FC Vs Shillong Lajong FC
August 8, Thawhṭanni
12:00 PM Ramhlun North FC Vs Bethlehem VT FC
August 9, Thawhlehni
12:00 PM Shillong Lajong FC Vs Dinthar FC
# Team Pld W D L GF GA GD Pts
1 Shillong Lajong 2 2 0 0 6 2 4 6
2 Zo United FC 3 1 2 0 3 2 1 5
3 Ramhlun North FC 3 1 1 1 3 5 -2 4
4 Dinthar FC 3 1 0 2 2 3 -1 3
5 Bethlehem VT FC 3 0 1 2 3 5 -2 1
* Bethlehem VT FC -in semifinal an lut thei tawh lo.