Theihna kan nei - Martinez

Belgium coach a nih hnua thuthar thehdarhtute a hmachhawnna hmasa berah Roberto Martinez chuan khawvela a ṭha ber ni tura theihna sang tak an neih thu a sawi chhuak.

FIFA ranking-a pa-hnih-na hian khawvel huapa player langsar - Thibaut Courtois, Eden Hazard, Marouane Fel-laini, Kevin De Bruyne, Christian Benteke, Michy Batshuayi te neiin 'golden generation' tiin hming lem an vuah sak.

Mahse, Belgium hian inelna lianah hnuhma an nei ṭha thei rih lo. 2014 World Cup leh Euro 2016-ah khan champion tura rinkai ni phak mah se quarterfinal an paltlang zo lo a, Belgian FA chuan coach Marc Wilmots an ban zui bawk.

Kum 43-a upa Martinez chuan, "Theihna kan nei a, hnehna chan duhna thinlung kan neih tel a ṭul. Player ṭha rualte hian an chunga mawhphurhna leh beiseina nasa lutuk awm lo a nuamti taka an inkhelh theih a pawimawh," a ti.

Spanish manager chuan sawi chhunzawmin, "Mipui hmuh duh leh ngainat ni turin attacking game kan khel tur a ni a, chutih rualin kan goal kan venhmin a ṭul bawk. Ram mipuite hian kan chungah rinna leh beiseina an nei sang dawn a, chumi hmachhawn thei tur chuan kan ṭha tawk," tiin Belgium mipui beisei ang thlen sak theih ngei a inbeisei.

Season hmasa khan Everton manager Mar-tinez kaihhruaina hnuaiah Romelu Lukaku a khel
ṭha ṭhin a, Toffees tan hian Premier League-ah goal 18 khungin tunah hian Chelsea nen sawi zawm mek an ni.

Toffees manager hlui hian Belgium striker Lukaku chu 'world-class striker' ni tura a chher chhuah a nih thu leh club lama a lo hman thiam tawh mid-fielder Kevin Mirallas chuan theihna sang tak a neih thu a sawi lang tel bawk.