League Cup Semifinal: Hliam tuar Spurs khelmualah Liverpool

Tottenham Hotspur-in tun season-ah beisei an phak lo a, 'tluk leh din an fawm' tih hian London club dinhmun dik tak a hrilhfiah chiang ber - Premier League-a an match hnuhnung pariatah vawi khat chiah an chak!

Spurs hi tun season EPL-ah vawi sarih chiah an la chak ve a, table-ah 12-na an ni mek! Spurs tan champion sawi rik chi a ni lo a, European football pawh an vanneih chuan Europa Conference League an khel mahna tih chauh a ni.

Hetiang taka season duhawm lo hmangtu club hian nomawi beiseina pakhat erawh an la nei a, League Cup-ah semifinal an khel dawn. Spurs hian zanin dar 1:30-ah tun season-a team hmuhnawm ber pawl Liverpool an mikhual ang.

Mahse, Reds hi EPL lama Spurs hnuai chiaha awm Manchester United hneh zo lo hlim an ni a, Pathianni zan inkhel hautak hmachhawn hnu, Nilaini zana Spurs lenchilh lehnghal hi Liverpool tan a awlsam dawn lo - Spurs tan beiseina neih a thiang e.

Nomawi chawitu

Spurs coach Ange Postecoglou-a'n, "Ka season hnihnaah ka champion ṭhin," tiin club a enkawl kum hnihnaa nomawi a chawi ṭhin thu a lo sawi tawh a, tuna an beisei theih ber chu Caraboa Cup hi a ni - mahse, an kalkawngah Liverpool ber kher an awm.

Tottenham hian kum 2008-a League Cup champion an nih hnuah champion nomawi chawi an nei leh tawh lo a, a rei vang vang tawh hle. He thawnthu duhawm lo hi Postecoglou hoin thlak an tum dawn a ni a, a awlsam dawn lo.

Tun season-a Spurs vanduaina pakhat chu player an inhliam thei lutuk hi a ni. Zaninah pawh tuin nge Liverpool tlarhma nawr na tak chu dal ang, tih chu zawhna a ni dawn a, a harsa riau!

Spurs first-choice goalkeeper Guglielmo Vicario chu hliam vangin a chawl mek a, a thachhang dawltu Fraser Foster chu an league match hnuhnung berah khan damlohna avangin a inlan thei lo a, third choice Brandon Austin-a'n Spurs tana a match hmasa ber khelin si ban a nghak hial.

Buaina chu

Spurs hian Slavia Prague aṭangin keeper Antonín Kinský an la lut hial a, Czech keeper hian zaninah si ban a nghak nghal kher ang em, tih pawh zawhna awm thei a ni.

Tlarhnung lamah London club an buai lehzual. Cristian Romero, Micky van de Ven leh Ben Davies te chu hliam vangin an chawl vek a, Newcastle United laka an tlawm khan centre back pangngai nei loin an khel!

Magpies lakah Radu Drăgușin a inhliam a, anni bakah hian Destiny Udogie, Richarlison, Mikey Moore leh Wilson Odobert te chu hliam vangin an chawl bawk. Spurs tan buaina tham a tling tih loh rual a ni lo.

Hetiang boruak karah hian Liverpool an hmachhawn dawn a ni a, Postecoglou hian season hnihnaa nomawi a chawi ṭhin chu a chhunzawm thei kher lo mai thei - chhunzawm an tum tak tak chuan Reds lakah an zia tak tak an chhuah a ṭul ang.

Hei le Liverpool

Spurs-in result an nei ṭha lo a, fans an lungawi lo. Hetiang boruak kara Reds lo mikhual hi fan-ten an châk lo a, club thuneitute lakah an lungawi lo bawk - zaninah pawh team pahnih inkhel hi entu an tam dawn lo!

Tottenham hian a tirah mimal pakhat tan he inkhel enna tur ticket lei ṭeuh theih a nih loh thu an puang a, mahse, semifinal a hnai tawlh tawlh a, mi pakhat tan ticket pathum lei theih a ni tawh tih chu Spurs lamin an puang tlaikhawhnu.

Ticket hralh ṭhat loh vang a ni tih a chiang a, an hralh ṭha thut a nih loh chuan an khelmual an khat dawn lo chiang. Mahni club chak lo lai en an châk lo, tiin a sawi theih a, chutihrual chuan Liverpool hi chak chianga dah chi an ni bik lo.

Reds hian Pathianni zanah, harsatna nei loa an hneh mai tura ngaih Manchester United an hneh zo lo a, an draw - hei mai a ni lo, an vanduai zan ni ngat se, Reds hi tlawm thei an ni a, defender Trent Alexander-Arnold-a'n thawm a lo nei ve reng nen, an boruak a ṭha tawk lo.

Hahdam hun?

Postecoglou-a'n a season hnihnaah nomawi a chawi ṭhin thu a sawi laklawh tawh a, League Cup champion ngei tumin Liverpool lakah a squad ṭha ber a chhuahpuiin a rinawm - a vanduaina erawh Arne Slot-a'n a 'B' team a khelhtir bik kher lo mai thei!

Liverpool hi United nena inkhel chau hlim ni mah se, kartawpah league match khelh tur a awm lo a, FA Cup third round-ah Accrington Stanley an mikhual dawn - anni hi League Two club an ni a, hetih hunah hian Slot-a'n player a hahdamtir thei ang.

Chutihrual chuan tun hnaia khel chhia player erawh chawlhtir an nih a rinawm. Andy Robertson aiah Kostas Tsimikas chu lut tura ngaih a ni a, Arnold aia lut turin Conor Bradley a awm bawk.

Mohamed Salah hi hahdamtir pawh ni se, Diogo Jota a la awm a, United laka yellow card hmu Darwin Nunez pawh a yellow card pangana avangin karlehah league match a khel thei dawn lo a, Slot-a'n hman theih a nihnaa chhawr mai a duh ang.