LZ-a'n Mumbai a chakpui

Thawhṭanni zan Indian Super League inkhelah Mumbai City chuan 3-2 in East Bengal an hneh a, Mizo tlangval pahnihin goal an khung - Lallianzuala Chhangtein Mumbai goal hmasa ber a khung a, David Lalhlansanga'n East Bengal tan a khung ve bawk.

Tun season-a beisei phak lo Lianzuala'n goal hmaa a vanduaina chu East Bengal lakah thaichhiain, minute 39-naah goal hmahruai a khung a, Nikolaos Karelis-a'n chawlhlawk hma lawka belhchhah ve leh bawkin, 2-0 in chawlhlawk an hmang.

Mahse, East Bengal an beidawng lo - minute 66-naa Sahil Panwar-a 'own goal' hmangin si phurh an sut ṭhen a, minute 83-naah David Lalhlansanga'n si phurh a sut zo bawk.

Hun tawp nan minute sarih chiah a awm tawh avangin team pahnih hi an in draw mai a rinawm hman a, mahse, Mumbai tan Greece international hlui Karelis bawk inlar lehin, goal a khung belh a, 3-2 in Mumbai club an chak.

Lianzuala'n tun season ISL-a goal hnih a khungna chiah a ni a, heti zat goal khung tur hian match 14 a khel hman - assist vawi thum a nei tawh bawk a, Kolkata club lakah a goal hian inrintawkna a pe ang.

Mumbai coach Petr Kratky chuan, "LZa hi player ṭha tak a ni a, a phu reng vanga club captain a ni. A goal khung khan inrintawkna a pein ka ring a, a laia a tal tam hian nuam a ti ber. Season hmasa pawh khan season chawhnu lamah a rawn vul a nih kha - thawhrim hi chuan lawmman a nei leh nge nge ṭhin a, ani aia thawkrim kan club-ah an awm lo. A rawn vul leh dawn," a ti!

AIFF Player of the Year ni lai LZ-a bakah hian Hmingthanmawia Ralte chuan inkhel bul a ṭan a, Daniel Lalhlimpuia chu bench aṭangin a lut bawk - East Bengal lamah Lalchungnunga'n bul ṭanin, David-a chu bench aṭangin a lut thung.

Vairengte tlangval David-a tan tun season hi ISL-a a season hmasa ber a ni a, match kua chiah a la khel chungin goal thum a khung tawh - khelmualah minute 223 chiah hun a la hmang a, heta ṭanga teh chuan a record hi a ropui hle.