Chelsea-in Guehi lak lêt an duh

Chelsea-in kum 2021-a an hralh Crystal Palace leh England defender Marc Guehi chu tlarhnung thuam chak nan laklet leh an duh. Blues hian pound maktaduai 18-in Guehi hi an hralh a, lalet tur chuan an hralhna let li tal sen a ṭul ang.

Enzo Maresca hote hian league match 20 aṭangin point 36 an hmu a, goal 24 chhuahin table-a a sang panga zingah goal an chhuah tam ber. Harsatna belhchhah turin centre back Wesley Fofana chu malpui hliam vangin tun season-ah a inlan dawn tawh lo a, Benoit Badiashile pawh February hmain a let hman a rinawm loh.

Chelsea-in tlarhnung thuam chakna tur player an zawng a, Guehi chungah an mit a fu. English defender Guehi hian Stamford Bridge-ah rin a hlawh lo a, Blues tan League Cup match hnih chiah a inlan. Guehi hian loan hmangin Swansea a zawm a, Swans tana season khat leh a chanve a khelh hnuah Chelsea-ah kir loin Palace-ah a lut.

Eagles tan Guehi hian hmun pawimawh a chang a, tunah hian season lina hmang mekin Premier League-ah ringawt pawh match 117 khel tawhin England tan match 22 a khel tawh bawk.

Chelsea hian Guehi duh mah se laklet erawh a awlsam dawn lo. Nikum nipui bazarah Newcastle-in Guehi lakluh tumin Palace hi ṭum li an dawr a, an hlawhtling lo - an dawrna hnuhnung ber hlut zawng hi £65mtd a tling hial.

Chutihrualin Chelsea hian loan hmanga Palace tana khel mek Trevoh Chalobah chu laklet an tum niin a sawi a awm a, Boca Juniors aṭangin Argentinian defender Aaron Anselmino chu an lalet tawh thung. Kum 25 mi Chalobah hian Eagles tan tun season-ah match 14 khel tawhin goal thum a khungsak tawh a ni.