Vawi ruk chak zawn thei Forest!

Nottingham Forest chuan an mikhualna ramah Wolverhampton Wanderers chu 3-0 in an hneh a, kai thar Forest hian Premier League an khelh hnuhnung parukah hnehna an chang vek.

Thawhṭan zan Molineux Stadium-a inkhelah Forest tan Gibbs-White, Chris Wood leh Taiwo Awoniyi ten goal khat ṭheuh an khung, mualneitu lamin a chhanletna an nei ve lo.

Minute sarihna lekah Gibbs-White-a'n goal a khung ṭan, a club hlui laka a goal khung lawm nan hian amah auel tute chu ngawi turin a ti. England international hi tun hma chuan Wolves tan a khel ṭhin.

Mahse, Wolves hian an chhawr tam tawk lo - club pahnih Swansea City leh Sheffield United lamah te loan hmangin an chhuahtir, chumi hnu kum 2022 khan Forest hi a zawm a, season duhawm an hmang chho mek a ni.

Chawlhlawk hmain Chris Wood chuan season kal laia a goal 12-na a khung a, hun tawp dawnah Taiwo Awoniyi chuan an chak nemnghehna ni turin counter attack aṭangin a khung bawk a, harsa lutuk loint point thum an hlawh chhuak.

Forest hian nikum December thla tir khan Manchester City an ngam lo, a hnuah Manchester United (3-2), Aston Villa (2-1), Brentford (2-0), Tottenham (1-0), Everton (2-0) leh Wolves (3-0) te an hneh vek a ni.

Premier League match 20 aṭanga vawi kua ngawt goal chhuah lohna match nei thei an ni a, coach Nuno Espírito Santo leh a nauten hna an thawk ṭha tih a chiang. Wolves coach hlui ni bawk Santo chuan, "Kan khelh dan leh inrintawkna kan neih ṭhat avangin result a ṭha.

"Player zawng zawng an khel ṭha, uluk taka lo en chuan Callum Hudson-Odoi leh Anthony Elanga te chetla te kha an chhut thiam ang, inrintawkna an ngahin kan khingpui tan khan an hnawksak takzet a ni.

"Ka naute hian nuamti takin match hi khel se la, player zawng zawngin inrintawkna neiin result ṭha sual chhuak ṭhin se tih chu ka duhthusam a ni," tiin a sawi a, season an hman danah a lungawi tih a sawi tel bawk.

Premier League bikah chuan Nottingham Forest hmachhawn leh tur chu Liverpool an ni dawn, hmahruaitu nen an intawn hma hian Luton Town nen FA Cup third round an khel hmasa leh phawt dawn a, player an insiksawi ve hret a rinawm.

Santo chuan, "Liverpool kan la ngaihtuah hman lo, a hmain Luton Town kan ngaihtuah hmasak a ngai," a ti. Khelh zat inangah Arsenal nen point 40 ve ve an hmu thei a, an tan chuan season ṭha a ni - an chungah Gunners leh Reds chauh an awm hial a ni.

Premier League-ah hian, a tir lam match 20 aṭanga point 40 hmu tling thei te chuan a sang zual pali zinga tel chungin season an khar tlangpui, hetiang zinga tel phak zui ta lo chu team pali chauh an la awm - tuna a lan dan chuan Forest hian season thar atan Champions League an beisei ngam.